صندوق الحب..

صندوق الحب..
بقلم الكاتبة هنادي العماوي


هاي الليلة رح تتغير حياتي ..رح انتقل من بيت اهلي يلي ولدت فيه وعشت فيه طفولتي وشبابي لبيت زوجي يلي رح اكمل فيه باقي عمري ..متل اي بنت كان لازم افرح انه لح يصير عندي مملكتي الخاصة ولح يكون عندي زوجي يلي هو سندي بالايام الجاية بس انا ما كنت سعيدة😢 ..كنت خايفة كتير من هالمملكة يلي بشاركني فيها حدا تاني .. لحسن الحظ هالحدا مانو ضرة تورجيني نجوم الليل ولا نو حماية توقفلي عالوحدة ولا نو سلفة تغار مني على كل شي ..
هالحدا كان طفلة بريئة عمرها15سنه ..بنت جوزي يلي ماتت امها من 3 سنين وتركتها تكمل حياتها مع ابوها .😣.
زوجي كان رافض فكرة انه يتزوج لحتى التقينا وتعرف علي بالشغل .. انا استاذة مدرسة انتقلت لمدرستهم وتعرفنا على بعض وحبينا بعض .. لما تقدملي ما حد وقف معي ..كيف بدك تتزوجي رجال اكبر منك ب 18 سنه وشو جابرك ..انت حلوة وموظفة ..وكمان عنده بنت بكرة بتصيرلك متل الضرة ..انا حبيت محمود كتير ومستعدة اتحمل كل الصعوبات في سبيل كمل حياتي حده ..😍
اليوم عرسي ..لبست فستاني الابيض وكنت شايفة حالي اميرة ..عيون ماما كانت كتير حزينه وهالشيء انعكس عليا..
-ماما ما تقلقي علي والله انا اخترت صح😟
-انت حرة يا خولة هاي حياتك انا نصحتك كتير بس ما سمعتي 😦
- لا تخافي ماما رح تثبتلك الايام انه محمود منيح وبيحبني وحيعوضني عن حرمان الاب يلي عشت كل حياتي بلاه😍
حضنت امي وبوستها وبكيت على صدرها ..اجا محمود واخدني وعملنا حفله صغيرة وبعدها عالبيت .. بنته رهف ما كانت موجودة ولا حضرت الحفله .. انا بعرف موقفها ..هي كانت رافضة فكرة زواجنا من البداية.. بس محمود كان دايما يقنعني انه انا بتعاملي المنيح معها و اهتمامي فيها ممكن خليها تحبني وممكن عوضها عن حنان الام ..وانا قبلت هالتحدي ..
فتت عالبيت .. ما كان فيه صوت .. ولا كانه حد موجود .. سالت عن رهف قلي محمود انه نايمة ..فات اطمن عليها ورجع لعندي ..كان كتير حنون معي وبيحبني كنت حاسة اني حمامة عم تطير بسما الحب .. كانت هالليله من احلى لحظات حياتي .. بعد كم ساعة انتبهت على حالي انه غفيانه انا ومحمود قمت غطيته ورحت عالتواليت ..وانا ماشيه سمعت صوت من غرفة رهف متل كلام او همس قربت عند الباب ..سامعة صوت بس ما عم بفهم شي ..فكرت دق الباب بس تراجعت ..رحت ركض فيقت محمود وقلتله انه في صوت باوضة رهف ..فاق متل المجنون .. فتح الباب لقا رهف نايمة ورايحة بالنوم 😴 .. قلي شو بك حبيبتي نقزتيني ..البنت بسابع نومة شكلك عم تحلمي ..ضمني لحضنه واخدني عالغرفة ..بس انا متاكدة انه كان في صوت ..انا سمعته باذني 😯
ما كنت بعرف انه من هون حتبلش معاناتي وحيكون هالصوت المنغص لعيشتي
الجزء التاني
ضليت طول الليل عم فكر بالصوت يلي سمعته ..طيب لو رهف نايمة منين اجا الصوت ..معقول موبايلها كان شغال او هاد صوت خارجي .. اقنعت حالي انه هيك ونمت 😴
طلع الصبح قمت وحاسة حالي تعبانه كتير ..لقيت رهف بالمطبخ عم تساوي نسكافيه
- صباح الخير رهف حبيبتي
-هلا خالتو نورتي البيت 😍
انصدمت كتير من ردة فعل رهف ..ما احلى لسانها ولا اطيبها ..كان وجهها متل الملاك وكانت عم تبتسملي طول الوقت ..الحمد لله يارب انا توقعت اتعذب معها كتير بس الحمد لله باينتها ظريفة وحبابة ..كنت بعرف ربنا ما لح يتركني ..اكيد محمود اقنعها .. خلصنا فطور ..رهف نزلت عالمدرسة و محمود اخد راحته معي انه البيت فضي وخلينا نكون سوا😉
انا كنت مبسوطة بلهفتو علي وحبه الي .. بعد ما خلص اللي بده اياه قلي انه نازل يجيب اكل وشغلات للبيت .. اتصلت ماما وقالت انه جايه العصر هي وخالتي يباركو ..قمت حضر حالي ..لوحدي بالبيت ..ما كان بده شغل كتير .. فتت على غرفتي رتبتها وبعدها رحت على غرفة رهف .. حاولت افتحها ما فتحت شكله قافلتها بالمفتاح .. طيب ليش شو فيها الغرفة لتقفلها ..تركت الباب وعم امشي اسمعت صوت طالع من الاوضة متل واحد عم يئن ويستصرخ ..خفت كتير وبلش قلبي يدق ..قربت اذني عالباب وقلبي عم يرجف ..الصوت كان يزيد متل حد عم ينادي ويطلب المساعدة ..رجلي ما حد حملوني و رحت ركض على غرفتي وصرت ابكي ..سمعت الباب فتح هاد محمود لقاني عم ببكي ..لك شو في مالك ليش عم تبكي 😯
-الصوت يا محمود الصوت ..تعا شوف تعا اسمع ..قرب محمود عالغرفة ..الصوت واقف وما في شي ..شو بك يا مخلوقة من مبارح وانت تقوليلي صوت انت خايفة من شي
-والله سمعته واحد عم يبكي افتح الغرفة وشوف انا متاكدة ..
فتح محمود الغرفة ..فتحت معه 😯
-بس والله الباب كان مقفول بالمفتاح قبل شوي ما فتح معي 😢
-بلا هالاوهام هاي الباب فتح بعدين ليش رهف بدها تقفله
فتت الغرفة وانا خايفة كتير ..بلشت دور هون وهون ..ما في شيء غريب ..يارب انا شو عم يصير معي .. عنجد كان الباب مقفول ..عنجد كان فيه صوت
كنت حاسة حالي مجنونة .. 😯
الجزء التالت
رهف رجعت من المدرسة وتغدينا سوا وكان كل شي تمام ..عيون رهف كلها براءة وحب ..يسعدلي قلبها شو حبيتها وشو حسيتها قريبة للقلب .. خلص الغدا واجت ماما وخالتي والصبايا باركولي وقضوا عندي وقت منيح .. ماما سالتني عن احوالي وطمنتها انه كل شي منيح بس انا من جوا كنت خايفة كتير 😯
اجا الليل و كان كل شي تمام .. سهرنا انا ومحمود وبعدها نام ..هو كان نومه تقيل وصعب يفيق وانا على عكسه ..الناموسة بتفيقني ..كنت عم بتقلب بتختي وفي شي عم يقلي روحي على غرفة رهف واسمعي اذا فيه صوت ..طيب انا شو بدي بهالقصة .. ليش بدي اعمل هيك .. ليش لخوف حالي ..الفضول قتلني بدي اعرف شو في انا مو مجنونة انا متأكدة انه سمعت شي .. قمت من جنب محمود ومشيت لعند الغرفة وانا عم ارجف .. وقفت شوي ما سمعت شي قلت الحمد لله باينته شي و راح لحاله .. عم امشي بدي ارجع عالغرفة اسمعت شي انكسر بغرفة رهف ..الصوت كان قوي كتير فتحت الباب بسرعة لشوف شو في ..كان مقفول ..حاولت افتح اكتر من مرة ما فتح ..نفس الصوت تكرر و انكسر شي تاني والصوت كان اقوى .. ركضت لعند محمود متل المجنونة
-محمود محمود فيق 😯 شغلات عم تتكسر بغرفة رهف
- خولة لا تجنيني مو كل يوم هالقصة نامي بقا
-والله في صوت تكسير ..بس هالمرة قوم معي واذا ما في شي لا عاد تصدقني 😯😣
قام محمود ركض وفتح غرفة رهف ما فتحت معه ..الباب كان مقفول ..الحمد لله يارب انا ما بتوهم الباب مقفول فعلا .. دق محمود الباب اكتر من مرة ..فتحت رهف وهي مفزوعة والخوف بعيونها
-شو بابا في شي ليش عم تدق هيك 😯
-بابا صار معك شي
انا تركتهن يحكو وفتت الاوضة بسرعة دور عالتكسير ..بس ما كان في شي ما كان في شي 😯 ولا اي آثار لشيء ..حتى غرفة رهف متل ما هي ما فيها شي ناقص او مفقود ..الفازات والصور وكل شي ..
اطمن محمود على رهف وضمها بحضنه وطمنها .. قلبي وجعني على رهف كانت خايفة من هجومنا عليها بهالليل ..بس ليش قافله بالمفتاح ..قالت انه كانت تبدل بيجامتها ووقتها قفلته ونسيت تفتحه ..
ضميتها لرهف وطمنتها ونيمتها ..كانت متل الملاك بين ايدي وحسيت حالي خايفة عليها ..اطمنت ونامت 😴
هالقصص صارت تتكرر كل يوم وانا بلشت خاف .. الصوت عم يزيد .. و الاشياء الغريبة عم تكتر .. يوم عن يوم عم بفقد اعصابي ..سألت رهف اذا كانت عم تسمع اصوات او شغلات غريبة ..قالتلي انه احيانا كانت تسمع وخبرت امها الله يرحمها اكتر من مرة وانه ما حد صدقها ..كلام رهف اكد شكي معناته البيت فيه شيء وهاي البنت عم تأيدني ..لازم اقنع محمود يجي حد ويقرأ عالبيت
الجزء الرابع
بلشت اقنع بمحمود انه يجيب شيخ ويقرا عالبيت .. محمود ما عم يستوعب كلامي ولا حاسس انه فيه مشكله اصلا ..بالاول رفض وبعد ما الحيت كتيررر وافق مشاني ومشان اوقف بكا ..بعد كم يوم اجا شيخ عالبيت و بلش يسال اسئله عن الوضع والبيت و فتش شوي وقرأ شوية ايات واذكار وبالاخير قال لجوزي يمكن يكون معموللكم سحر و بنحاول نفكه ..محمود شكره وبعدها قلي انسي الموضوع ما في شي بالبيت وانا عمري ما سمعت اصوات الا من يوم ما اجيتي ..انا توترت كتير وتخانقت معه وقلتله شو قصدك انا يعني نحس ولا مجنونة ..رهف حاولت تهدي الوضع وقالت لابوها انه يكون لطيف معي ويوقف جنبي .. بلش الخوف يزيد بقلبي وماني عارفة لمين اشكي ..فكرت كتير .. لازم افهم شو فيه ..لازم ..😐
اجا الليل واجا الهم ..كنت قضي ليلتي قاعدة وعم فكر والدموع بعيني 😢 .. رحت جيب مي من البراد حسيت بحد مسكني من كتفي وضغط علي ..انا من الرعبة درت وجهي كان حد لابس ابيض بابيض .. حاولت اهرب وصرت صرخ لقيت ايد تانية سكرت تمي ..صوتي ما عم يطلع و دموعي ما عم تنشف ما حسيت بحالي الا واقعة بالارض
.. فقت لقيت حالي على تختي .. خبرني محمود انهم لاقوني مرمية عالارض وعم ببكي .. حاول محموظ يهديني حكيتله اللي صار .. وكالعادة ما صدقني بس حاول يهديني
-محمود انا ما عاد لي قعدة بهالبيت .. لازم ننتقل لمكان تاني ..هالبيت مسكون
رهف صارت تبكي وتترجى ابوها انه ننتقل وانها خايفة كتير .. محمود كان عم بهديني وقلبه تعبان مشاني ..
-خوله روحي عند اهلك كم يوم روقي اعصابك .. كملي اليوم وبكرة باخدك 😯 لبين ما لاقي حل
انا مو حابه فكرة انه اتركه لحاله بس ما كان عندي حل .. طلبت منه اخد رهف معي بس هو رفض وقالي بنيمها عند خالاتها لبين ما حل القصة ..😑
كملت نهاري وانا كتير تعبانه .. اتصلت على امي وخبرتها انه جايه اقضي يومين عندها .. محموظ طلع من البيت يجيبلي كم غرض اخدهم معي وبقيت استناه انا ورهف .. بعد كم ساعة فهمت كل الموضوع وما عاد في داعي روح لبيت اهلي 😯
الجزء الخامس والاخير
كنت عم استنى محمود على نار بدي اطلع من هالبيت يلي ما حسيت بالامان فيه ابدا .. كل دقيقة عم بتمر عم اختنق اكتر ما عاد اقدر اتحمل كل هالخوف .. قمت حضر شنتايتي وعبي اغراضي .. وانا عم طلع الاغراض حسيت ايد خنقتني من رقبتي كانت عم تضغط كتير حاولت فكها ما حسنت صرت ابكي واصرخ ..اطلعت قدامي لقيت حد تاني صار يضغط فوق ايد الشخص الاول .. صرت ابكي واتنين عم يخنقوني .. بلشت افقد التنفس 😯😣 ما قدرت اعمل شي .. فكرت بسرعة انه اوقع عالارض وكاني متت ليتركوني .. وفعلا مثلت اني غميت ووقعت بالارض 😯 تركتني اول ايد وصارت تصرخ
-خلص اتركيها ماتت بايدينا ماتت 😯
-لسه ما ماتت لازم كمل عليها
-بعدي عنها نحنا بدنا تتركنا ما بدنا نموتها 😦
قلبي كان عم يدق بقوة وعم بسمع الحديث ومغمضة عيوني ..صوت رهف عرفته منيح بس مين هاي التانية .. حسيت انه في وحدة فيهن طلعت ركض .. هاي اكيد التانية لانه رهف قالتلها بسرعة قبل ما يجي بابا .. انا ما حاولت افتح عيوني الا لتاكدت انه التانية طلعت .. رجعت لعندي رهف وقعدت جنبي وكانت تقلي .. بكرهك كتيررر 😣
سمعت هالكلمة غص قلبي فتحت عيوني .. وقتها خافت وقامت متل المجنونة .. قالتلي مالك خالتي شو صاير معك .. وقتها انا قعدت بصعوبة وقلتلها
- رهف ليش بتكرهيني ليش بتعملي فيني هيك انا شو عملتلك 😢
-انا انا انا ما بكرهك بالعكس خالتي
-رهف انا شفت كل شي انا بعرف انه انت اللي ورا كل هالقصص انا كنت صاحية وشفت اللي كانت معك 😯
-شو عم تحكي ..😦 شو بدك مني
-رهف احكي كيف عملتي كل هاد كيييف .. كيف كنتي تبقي نايمة ويطلع اصوات ..كيف كنت تبقي بالمدرسة و اسمع تكسير كييف
-ما دخلك 😣 ما دخلك انت بس اطلعي من حياتنا
-طيب فهميني رح جن
-انا بكرهك شو بدك منا انت فتي تخربي حياتنا وانا بوعدك ما هنيكي 😡
-انا جيت لعوضك عن حنان امك انا جيت لوقف جنب ابوك
-نحنا ما بدنا ياك ..بابا الي ولماما بس
-طيب خبريني كيف هيك عملتي واذا بدك بوعدك انسحب من حياتكم واطلب الطلاق من ابوك
- بتوعديني بتوعديني تتركينا لو فهمتك
-بوعدك 😢
-هاي اللي كانت معي خالتي اخت امي وهي اللي ساعدتني بكل القصة وفهمتني شو نعمل .. الاصوات كانت تسجيلات كنت شغلها الك لانه بعرف بابا ما بيفيق بالليل .. كنت سكر باب الغرفة بالمفتاح وبس تركضي تفيقي بابا افتحه .. خالتو نامت عندي اكتر من ليله بدون ما تحسه .. كنت فوتها بس اتاكد انكم نمتو ..كانت تساعدني بالتكسير وضبط الوضع ..وقت هجمنا عليك عند البراد كانت هي معي ووقت اكون بالمدرسه هي كانت تتولى هالمهمة 😡
فهمت من كلام رهف انه خالتها السبب بكل هالفيلم وانه هي اللي عم ترسم وتساعدها .. زعلت على حالي كتير وانه هيك صار فيني بس الحمد لله اني طلعت مو مجنونة ولا طلع البيت مسكون 😢
ومتل ما وعدت رهف .. قررت وفي بوعدي ..انا مو ممكن كمل مع هالبنت بنفس البيت .. هي بتكرهني كتير ومو ذنبها شاركهها بابوها .. طمنت رهف اني رح اطلب الطلاق من ابوها وهي ترجتني ما خبره عن شي وانه انسحب من حياتهن بهدوء ..
لما اجا محمود حاولت نفره مني وقلتله اني كرهتو وكرهت بيته وما بدي كمل معه ببيت الاشباح .. استغرب كتير من كلامي واخدني على بيت اهلي مشان اروق اعصابي .. طلبت منه انه توصلني ورقتي باسرع وقت ..عيون رهف كانت مليانه سعادة 😀
تركت بيتي ورحت عند اهلي خبرت امي كل شي .. قالتلي انه انا نصحتك من قبل واتحملي غلطك .. بس قالتلي كمان انه لازم خبر محمود شو عملت بنته مشان يبعد عنها خالتها الشريرة يلي قلبها كل حقد .. انا ما وافقت ولا ممكن زعل رهف .. محمود كان يجي لعندي وارفض شوفه و طول نهار يرن وما افتح خط ولا احكي معه ..
ضليت على هالحاله شيء اسبوعين وانا مقضيتها بكا وحزن ..بعدها بكم يوم .. دق الباب
هاد محمود رفضت شوفه كالعادة .. اتفاجات انه فات لعندي شخص ما توقعته .. هاي رهف
-هلا حبيبتي وحضنتها
-خاله انا اسفة
-حبيبتي معلش لا تتاسفي جيتك لعندي بكل الدنيا 😀
-انت كتير منيحة انت وفيت بوعدك وما خبرتي بابا عني انا ما بكرهك
-وانا بحبك
-خالتي يلي طلعت مو منيحة بعد ما رحتي بكم يوم صارت بدها تتزوج ابي وطلعت كل مساعدتها الي مشان هيك
-وبعدين
-ولما قلتلها ما بدي حد يتزوج ابي .. قلبت علي وصارت تعاملني مو منيح .. انا ما عاد بدي شوفها 😥.. بس انت كيف ما حسيتي انه في حد بالبيت .. يعني كانت تفوت وتطلع وانت ما انتبهتي؟؟؟؟!
-انا من خوفي كنت ضل بغرفتي وحتى لما اسمع صوت ما استرجي قوم 😢
-ايه انا السبب بخوفك انا 😯😧😯
-حبيبتي اهدي و طولي بالك
-انا افتقدتك كتير ..انت كتير حنونة .. 😔😍
حضنتها والدموع بعنينا وصرنا نبكي نحنا التنتين
كان جنبها صندوق صغير فتحتلي اياه .. قالتلي هاد صندوق الحب فيه صور ماما وذكرياتنا وهداياها الي وانا محتفظة فيه لانه ما حد بيقدر يملاه الا ماما ..
-الله يرحمها يارب
-بدي اعملك صندوق متله وحط كل شي حلو بينا فيه .. رح جرب حبك متل ماما ..بتقبلي 😢
غمرتها والفرحة بعيوني
-طبعا بقبل الله يديم محبتنا .. رح عبيلك صندوق الحب بكل شي حلو لانك بتستاهلي
اخدت اغراضي ورجعت مع محمود ورهف وبلشنا حياة جديدة و ملينا صندوق الحب صور وذكريات ومشاعر واهم شي مليناه " حب "
دائما ينتصر الحب
انتهت

شاركه

عن غير معرف

هذا النص هو مثال لنص يمكن ان يستبدل في نفس المساحة ايضا يمكنك زيارة مدونة مدون محترف لمزيد من تحميل قوالب بلوجر.