يوم ماتت امي...

يوم ماتت امي...
بقلم الكاتبة هنادي العماوي


اليوم رح يكون حلو كتير ..رح تتفرج عالبيت يلي رح تتزوج فيه.. لبست احلى شي عندها وشخصت واستنت خطيبها لييجي ..وصلت السيارة ..ركبت ايناس مغ خطيبها علاء وهي كتير مبسوطة ..اخيرا رح يكون الها بيت مستقل ورح تودع بيت اهلها يلي عاشت فيه اسوا ايام حياتها ..ايناس فقدت امها من لما كان عمرها 7 سنين ..كان عندها اخ وحيد اسمه محمد
..بعد كم شهر من وفاة امها ما قدر ابوها يتحمل يعيش بلا مرة ..تزوج وحدة قريبته ..طبعا متل كل القصص ..كانت مرة اب عنجد ..عاشت معها ايناس ايام سودة وخاصة بعد ما صار عند مرة ابوها اولاد ..كان التمييز كبير ..ايناس كانت عم تحسب لليوم يلي تخلص فيه من هالبيت كله ..صار عمرها 19 ..تقدملها علاء وهو ابن صاحب ابوها..ما ترددت وقبلت ..علاء طيب ومنيح ..هي هيك شايفته
وصلو للبيت ..عمارة كبيرة مكونة من 6 طوابق كان بيملكها ابوه لعلاء ..ايناس الها طابق بالعمارة..طلعوا عالمصعد ..فاتوا عالشقة ..وااااااو كتير حلو المدخل ..فاتت جوا ..سمعت صوت رجلين عالدرج ..هاي حماتها
-كيفك ايناس
-الحمد لله كتير منيحة كيفك مرة عمي
-😑 تفرجي عالبيت وشوفي ازا في شي ناقص
.
..حماتها مديرة مدرسه وكانت تعامل الكل على هالاساس..مديرة بالبيت وبرة البيت
صفنت ايناس ..معقول رح اتعب معها ..كتير جامدة معي..بس انا شو علاقتي فيها..انا ببيتي وهي ببيتها
..
اتفرجت ايناس عالبيت ..كتير فخم وحلو وهي رح تكون مديرته .ما حد رح يتدخل فيها ..رح تلبس على كيفها وتطبخ اللي بدها اياه رح تغني وترقص وترسم وتحلم وتعيش كل شي محرومة منه ..ببيت اهلها ما بتحسن تعمل شي ولا الها حق بشي بس هاي حتكون مملكتها الخاصة ..قطعت صفنتها حماتها
-ايناس شوفي ازا المطبخ ناقصه شي مو صفيان كم يوم للعرس ..لا تضلي ساكته انا ما بتعجبني البنت اللي شخصيتها ضعيفة
- ايه مرة عمي كله تمام
-حاولي تقوي شخصيتك شو هاد ..خلي عندك تفكير مستقل
- في لسه بدي شوية شغلات متل اطباق الفواكه وفناجين قهوة
-من اولها مو عاجبك
-مرة عمي انت قلتي احكي وانا حك....
-خلص خلص انا نازله اعملو اللي بدكم اياه
..اطلع علاء بايناس وابتسم ..كانه بيقلها معلش
...
قعدت ايناس مع علاء شي ساعة كانت مبسوطة كتير..صار وقت الغدا ونزلو يتغدوا..قعدت ايناس جنب علاء عالصفرة ..بلشت تاكل معهم ..كانت شوي مستحية ..مالها مخطوبه الا شهرين
..
عمها ابو علاء كان كتير طيب ومبسوط فيها ..طول الوقت بيبتسملها ويشجعها تاكل ايناس كانت كتير مرتاحة الا من زورات حماتها...
.
رجعت ايناس عالبيت بعد نهار حلو .كان الاستقبال بالبيت احلى واحلى
فاتت ايناس عالبيت .علاء وصلها وراح..
طبعا استقبلتها مرة ابوها
-شو يا حلوة ما ضل الا تقعدي لنص الليل وكانه مالك اهل ..بس يلا اللي ما تربت بتعمل اكتر من هيك
.
ما ردت ايناس لانه بتعرف شو حيصير ازا ردت ..ابوها متل العادة رح يوقف مع مرته فهي اختصرت على حالها المشاكل و اتاسفت لمرة ابوها فتحية وراحت لغرفتها ..غيرت تيابها وراحت عالمطبخ تنضف مكان العشا
..كانت عم تجلي وتفكر ..يا ترى شو يعني ام ..كيف الام بتكون حنونة..معقول الام ما بتضرب ابدا ولا بتصرخ ابدا ..طيب كيف هالاحساس..ما عم اتزكره منيح ..امي تركتيني بدري كتير ..ما شبعت منك ..ما عم اتزكر شي ياااارب
- شو رح نقضي طول نهار بالجليات
-.........
-ايناس زفت ما عم تردي ..خلصي لسه فيه كتير شغل من الصبح
-طيب شو رح تعملي بس اتزوج
-ولي عم ترديلي جواب ..خلص كبرتي علينا ..رح اشحطك من بيت جوزك تشتغلي
..
نزلت دمعتها لايناس ..يلا كم يوم وبرتاح منك ..الله كبير ..
واجا يوم العرس ..علاء اخد ايناس لعند احسن صالون وك
طلعت بتجنن ..هي اصلا مجزبة وبتاخد العقل ..فتحية كانت عم تطلع فيها وتقول لبس البوصة بتصير عروسة ..والله هالبنت اخدت نصيب ما بتستاهله شب متل القمر واهله ملاكين بالبلد وبيت فخم ومكمل ..على شو ان شا الله ..حظ بيفلق الصخر
.
.كانت ايناس لابسه فستانها الابيض وكتير مبسوطة ..للمرة الاولى حست ايناس بحنان الاب ..قرب لعندها ..ما قال غير كلمة وحدة "سامحيني"
😯😯
نزلت دمعتها لايناس ..حضنت ابوها وراحت مع عريسها ..علاء كان طاير عقله فيها ..طالعة بتجنن وفستانها بيخوت ..كان عم يعد الدقايق ليروحو عالبيت 😆😆
....
وصلت لصاله الفرح ..استقبلتها مرة عمها بنت حماها سيرين اللي متزوجة وعندها ولدين
اطلعت فيها حماتها 😑😌 ووشوشت بنتها
-الشرشحة بدمهن هالعيله ..هاد فستان انا الحق علي يلي ركنت عليهن كان لازم جبلها الفستان بنفسي
- ما انا قلتلكن بلا هالبنت مو من مقامنا بس بابا اصر قال يتيمة ..اتلقوا بقا
...
سلموا على العروس بدون اي اهتمام ..علاء ابتسملها وقال :ايناس انت ملكتي وملكة بيتي ما تهتمي احد انا بحبك
...حست ايناس بالامان ..ومر العرس على خير
راحو المعازيم وراحت ايناس لبيتها ..ما كان معها حد ..وما كانت فاهمة منيح شو بده يصير بهالليله
غيرت بدلتها وساعدها علاء بهالشي .. حماتها لسه ما راحت ..كانت قاعدة بالصالون ..حطوا العشا وتعشت معهم ..ايناس كانت كتيى خجلانة ..بعد العشا فاتوا عالغرفة ..بعد شوي من الكلام فهم علاء انه ايناس ما عندها خبر بشي ..طلع لامه وطلب منها تفوت تفهم ايناس
..
فاتت حماتها
-شو يعني انت ما بتفهمي بشي بالدنيا ..بنات المدارس صاروا يعرفو بهالشغلات
-شو قصدك مرة عمي 😧
-طيب اسمعيني للاخير.. شو ما بيقلك جوزك اعملي وهاي انا ناطرتك برة
...
بلشت ايناس تتعب نفسيتها ..ليش بدها تضل هون ..ليش ما تروح لبيتها ..شو بدها مني ..يارب انا مكتوب علي ما حس ابدا بحنان الام ..حتى حماتي هيك
...
فات علاء لعندها وخبرها بكل شي على اساس انه امه فهمتها
😦😦😦😦 صرخت ايناس وخافت كتير
-ايناس مشان خاطري امي عم تستنى برا لازم نخلص والله بتزعل وانت ما لتعرفي زعلها
..
عرفت ايناس من هالليله انه هي مو جاية على جنة وانه لسه ايدها بالنار ..عرفت كمان انه علاء بيخاف كتير من امه وانه ما بيزعلها ابدا ..وانه زعلها بيخوف 😡😡
مضت هالليله على خير ..طلع الصبح ..طلب علاء من ايناس انه تلبس لانه امه اتصلت وقالت لازم ينزلو يفطرو مع العيله ..استغربت ايناس بس هي مو متعودة تحكي او تبدي رايها ..هيك كانت ببيت اهلها ..لبست طقم كتير حلو وعملت ميك اب بيخوت ونزلت مع عريسها
..فاتت عالبيت ..كان عمها ومرة عمها قاعدين عالطاوله ..بوستن وقعدت
-ايناس لازم تفيقي ابكر من هيك ..انا بنزل عالمدرسة ع 7.. لازم تكوني موجودة هون مشان تجهزي الفطور واشوفك قبل ما اطلع
.
عمها ما تكلم ولا علاء استرجى يرد ..ليش هيك ساكتين ..حست حالها ايناس قاعدة بالصف مع انسه الحساب لانه ما كانت تحبها
-حاضر مرة عمي
..خلصوا فطور ..بلشت تساعد بالبيت .ما كان في شغل ..حست انه مرة عمها عم تراقب حركاتها وانه ما عاجبها شي ..عرفت ايناس انه الله ما قطعها ..فتحية التانية 😥😥
رجعت ايناس لبيتها وكانت كتير زعلانه ..حاول علاء يفهمها انه كلمة امه ما بتصير تنتين وانه لا هو ولا ابوه بيقدروا يقولو لا وانه الجنة تحت اقدام الامهات وانه اعتبريها متل امك
-علاء..انا انحرمت من امي وانا صغيرة كتير ..كانت كتير حنونة بس ما لحقت عيش معها ..امي ما كانت هيك ..ما كنت اخاف وانا قاعدة معها ..انا بخاف من امك والله..
طلب منها علاء تطول بالها وتسمع كلام امه
...مرت الايام ..صارلن شهرين متزوجين وهن على هالحال ..ايناس ما بتقعد ببيتها ..طول الوقت عند حماتها عم تنفز اوامرها ..
.
-شو ايناس مانك حامل لسه
😦😦 ان شا الله مرت عمي
صار هالسوال ينسال كل يوم ..ايناس مش عارفة شو تحكي بس لسه ربنا ما طعمها
علاء بلش يضايق لانه ما عم بصير حمل امه كانت خانقته كل يوم بهالموضوع .. اكيد مرتك فيها شي ..صارلن 5 شهور متزوجين ..راحوا عالدكتورة وقالت ما فيهن شي و قضية وقت
ما اقتنعت ام علاء بالموضوع وصارت تضل تحكي فيه وتلسن انه احنا بدنا ولد وانه ملينا والبيت فاضي
..
ايناس كانت تبكي كل يوم ..يارب ما تحرمني .. نفسي كون ام ..
...
وبيوم كانت قاعدة مع حماتها
-شو ايناس برضو ما في حمل هيك كتير
-مرة عمي مو بايدي انا نفسي والله بس هي ارادة رب العالمين
-الله يسامحك يا ابو علاء
-ليش شو عمل عمي
-انا من اولتها ما بدي هالجوازة بس قلت معلش بس تطلعي ما بتخلفي ما رح اسكت
-طيب انا شو دخلني حرام عليك خافي الله 😣😓😓 وصارت ايناس تبكي
-عم تعلي صوتك قومي انقلعي ما بيلبقلك الاحترام عمرك ما حتصيري بنت عيله
... فات علاء عالخناق .شو في شو في
😯- مرتك عم ترد جوابات ..خدها وانقلعوا
..
راحت ايناس على شقتها وكانن عم تبكي كتيى ..ليش ما عم تدافع عني ليش
-ايناس هاي امي وبدها تشوف اولادي حقها
-شو قصدك لك انا مو عقيم ..الدكتورة قالت وقت
-طيب طولي بالك بس تاني مرة ما بتعلي صوتك على امي والا ...
-والا رح تضربني ..رح تهيني ..رح تموتني ..انا متعودة ..انا موجودة مشان اتبهدل ..شو يعني بدي اعمل ..انت بتعرف لو موتتني مش رايحة عند اهلي انت بتعرف😦😦
...
بلش علاء يهديها
يوم عن يوم عم تزيد المشاكل ..صارلن سنه متزوجين ..ما خلو دكتور والكل يقول استنو ما في مشاكل..اخدو مقويات كتيى وعالفاضي ..هلا امه صار معها حجة قوية انه تزوجه...
بلشت ام علاء تزن بموضوع زواجه ..ما كان موافق ابدا متل بشير بباب الحارة ..كل يوم يحكو بالموضوع بالاخير ما قدر يرفض طلبها ..حكا لايناس انه بحبها بس هاد امر ومش عارف شو يعمل ..صارت ايناس تبكي كل ليله وتدعي ربها انه تحمل وانه يسخرلها جوزها ..اتصلت على ابوها يلي ما زارها غير مرتين من اول ما تزوجت وبلغته انه زوجها رح يتزوج..ابوها قالها انه حقه المهم يعاملك بما يرضي الله ..وقالها لاتفكري تخربي بيتك وتجي لعنا لانه الشرع حلل اربعة وهاد حقه ..اتسكرت كل الابواب بوجهها ..ما ضل بايدها الا الدعاء ..كانت دايما تردد ..واستغفروا ربكم انه كان غفارا يرسل السماء عليكم مدرارا ويمددكم باموال وبنين ..كانت تقول ياارب ..
قررت ام علاء تخطبله بنت اختها يلي حاطة عينها عليها من اول
خطب علاء وعين ايناس تدمع ..بعد كم يوم عرسه ..علاء كان حزين مالو عين يطلع بايناس وهي مو فاقدة الامل بربنا
اتصال من اخته
-الو ...شو ...مين ...كيف
اجا الخبر الحزين ..اخته لعلاء المتزوجة يلي عندها ولدين صار معها حادث وبالمستشفى هي وواحد من اولادها
.نزل الخبر على ام علاء متل الصاعقة وبسرعة البرق عالمشفى
.اقل من ساعة ..الله يرحمها
دارت الدنيا بام علاء واغمي عليها .. ما حد عم يصدق كيف صار هيك ..بغمض العين راحت ..علاء وابوه وايناس ما كانو يوفقوا بكا ..ام علاء كانت متشنجة واكتر من شهر ما فارقت المشفى
.. عر س علاء تاجل والدنيا كلها وقفت ..
بعد فترة رجعت ام علاء عالبيت ..جابولها اولاد بنتها حضنتهم وكانت تبكي دم ..كيف بدهم يربو بلا ام ..ااااه يا بنتي ..كل ما كانت تشوفن تبكي
.
مرت الايام ..صارت عم تطلع باولاد بنتها وتشوف ايناس ..نفس الشي محرومين من الام ..ايناس ربيت متلهم ..ليش انا بعاملها هيك
صارت تراجع نفسها صارت تحس اديه هي ظالمة البنت ..
هاي يتيمة كان لازم كون انا امها وابوهة وكل دنيتها ..سامحني يارب
..
ايناس كانت واقفة معهم بهالمحنة ..نسيت كل شي عملتو حماتهة معها ..كانت عم تخدمها وتخدم الاولاد برموش عيونها.
صارت ام علاء تتغير ..وكانت عم تحن على ايناس وبلشت تحبها
..ايناس بادلتها المحبة وكانت تعاملها احسن معامله..
ام علاء عم تعيد النظر بموضوت زواج علاء ...بس يارب حقي شوف اولاده ..رح عالجها للبنت ووقف معها
.
.
فسخ علاء خطبته وكان كتير فرحان ..ايناس كانت تصلي لربها شكر وتحمده انه واقف معها ..بس يارب لا تذرني فردا وانت خير الوارثين
وفعلا ربنا ما تركها ..بعد فترة صغيرة ربنا جبر خاطرها وحملت وجابت بنوتة كتير حلوة سمتها هبة على اسم .....
انتهت

شاركه

عن غير معرف

هذا النص هو مثال لنص يمكن ان يستبدل في نفس المساحة ايضا يمكنك زيارة مدونة مدون محترف لمزيد من تحميل قوالب بلوجر.