لا تذرني فردا

لا تذرني فردا ....
بقلم الكاتبة هنادي العماوي


الجزء الاول
اليوم العيد .. يعني فرحة .. يعني بهجة .. يعني الواحد لازم يتناسى كل احزانه وهمومه لانه هاي هدية من رب العالمين مشان نفرح ونجدد حياتنا 😊
فقت الصبح على صوت زوجي ايمن عم يهمسلي بكل محبة :
كل عام وانت حياتي ووردتي واملي بالحياة .. كل عام وانت جنبي وسندي واحلى نعمة من رب العالمين .. بحبك لينا
كلامه اعطاني طاقة ايجابيه كبيرة وارتسمت بسمه عشفافي .. حضنته بكل محبة وشكرته على كل شيء حلو عم حسه معه.. 😍😍
قمت عملت قهوة وجهزت الفطور .. اكلنا سوا وكل شيء حلو وتمام .. لبس ايمن تيابه وودعني وراح مشان يعايد اخواته وانا بقيت بالبيت استنى اخواتي وقرايبييني .. لبست تيابي الجديدة و عملت ميك اب ناعم و جهزت الضيافة .. كلمت امي وحماتي وعايدتهم عالتلفون .. ما كان عندي شيء اعمله .. فتحت جوالي وبلشت اتصفح الفيس😯
العيد احلى مع قمراتي دانه و بانه
كل عام وانتم بخير من ولادي سعد وبراء وهبة
انتم عيدي يا روحي : منى واحمد
كل عام وانت فرحة عمري ابني قصي
.....
كل الصفحة كانت هيك .. كنت عم اتفرج وابتسم .. الله يهنيكن .. الله يخليلكن اولادكن .. ياااارب انا ما عم احسدهم .. يارب احفظهم .. بس يارب .. سامحني اني عم اقنط من حكمك .. بس والله نفسي بولد .. نطف قلبي ياااارب... عشر سنين كل شهر اتمنى كون حامل وبالاخير ما في شي .. كل سنه ب 12 شهر وكل شهر بموته وكل يوم بمية طعنة سكين .. دخيلك يارب اعطيني من فضلك يلي تفضلت بيه على كل هالعباد 😢😢😢
..
هالصور جددت احزاني وولعت النار بقلبي .. الله بيعلم انه مو حسيدة .. بس حاسه انه حقي يكون عندي بنت لبسها احلى فستان واحتار بقصة شعرها واقعد افتل كل السوق للاقي جزمة تلبق بلبسها .. حقي يكون عندي صبي شيكه متل الشباب و ووقفله شعراته😃 وانبسط انه رح يكبر ويصير سندي بالحياة .. اللهم لا اعتراض على حكمك ...
الجزء التاني
صوت الجرس عم يندق قطعلي حبل افكاري وهمومي واجبرني وقف دمعتي .. هدول اخواتي واولادهم ..انبسطت بشوفتهم كتير وضيفتهم احلى ضيافة 😍
- كل عام وانت بخير اختي .. وان شا الله العيد الجاي بيكون على ايدك احلى ولد
- الله كريم اخي
- والله يا اختي ما تزعلي لا الاولاد عاملين شيء ولا البنات .. كل واحد ما بينفعه الا حاله والعمل الصالح
..
هالنوع من الكلام والمواساة ما كنت حبه ابدا .. يعني خلص ما في داعي تذكروني كل فترة انه عندكم شيء انا محرومة منه ولا في داعي تبينولي انه هالنعمة ما الها قيمه عندكم .. عيونكم بتفضحكم .. وخوفكم على اولادكم بيبين اديش هالنعمة كبيرة وانتو فرحانين فيها .. كنت اسمع هالكلام وابتسم 😊 طبعا ابتسامتي وراها قلب عم ينكوي عالبطيء😯
..
راحو اخواتي .. اتصل فيني ايمن وقال انه راح ياخدني نعايد على اهلي واهله .. طبعا انا ما بحب هالاجواء ابدا لا عند اهلي ولا اهله .. هلء اخواته بيكونو مجتمعين و ما في حديث غير اواعي ولادهم ومن اي محلات اشتروا واديش اتعذبوا وانه ما بلبسوا اي شي وبالاخير الجمله الشهيرة
- ييي حبيبتي لينا سامحينا على هالحكي الفاضي بس ان شا الله بكرا ربنا بيعطيك وبتعرفي اديش كتيرة غلبتهم .. وطبعا انا كالعادة ببتسم وبقول : ان شا الله 😊
كل ابتساماتي بهالنوع من القعدات بتكون صفرا وباهته وما فيها روح .. بحس حالي مالي مكان بيناتهن .. نفسي حس بيلي عم يحكووه .. نفسي كون جزء من الحدث مو مارق طريق مالو علاقة بشيء 😯
بس ربي دخيل اسمه مو رايدلي هالشيء .. وصلت لبيت اهله .. عايدت حماتي يلي كانت كتير منيحة معي لانه هي بتعرف انه المشكلة من ايمن وانه انا ما فيني شيء .. كانت تعتبر انه انا صابرة على ابنها ومقدمة تضحية وبقيانة معه لاني بنت اصول .. بس هاد ما كان السبب ابدا ..
السبب الحقيقي اني بحبه لايمن واني ما ممكن لاقي رجال بحنانه وحبه وحنيته واني ما ببدله بكل اولاد العالم 😍 بعتبره نصي التاني و القلب الكبير والامان يلي الي بهالدنيا ..
قعدت شوي .. اجو اخواته يعايده على امهم ومعهن سلفاتي .. اول وحدة اسمها لارا كانت اصغر مني بشيء 15 سنه و كانت طيوبه وامورة وبعدها متل بنتي.. اتجوزت السنه الماضيه وعندها ابنها مهند .. والتانيه اسمها تمام اصغر مني بسنه ..تجوزت بعدي ب 3 سنين تقريبا وهلء عندها 3 اولاد صبيين وبنت .. تمام ما كانت تمام معي ابدا وكانت تغار مني كتير لانه زوجي بيحبني وبيدللني ووضعنا المادي ممتاز .. كانت تحاول قد ما فيها تجرحني بموضوع الاولاد وتحسسني انه هالشيء بميزها عني😦 ..
بالنسبه الي كنت حب من اولادها بنتها ملاك يلي هي ملاك فعلا بخدودها الحمر وشعراتها البني الغامق ولزتها وخفة دمها .. الصبيان مع انن صغار كنت حس عندن لؤم امهم .. كنت اشتهي الله يعطيني متل بنتها والكل بيعرف انا قديش بحبها لهالبنت وبميزها عن الكل 😊
سلموا علي سلفاتي وولادهم .. وطبعا ملاك حضنتني حضن كبيررر .. وسبحان الله الصغير بيحس بيلي بيحبه .. بادلتها نفس الحضن واعطيتها عيدية كبيرة وقعدتها جنبي ..
تمام : شو لينا اعتقيها لهالبنت .. خليها تقوم تلعب مع الصغار
لينا : والله ماني مانعتها قومي ملاك حبيبتي العبي
- ملاك : لا طنط بدي ضل معك 😍
- تمام : قومي ماما قومي .. خالتك لينا ما عندها عرسان قومي لا تلزقي 😂😂
طبعا هاي كانت اول جمله تطسني اياها ولسه الجاي اكتر 😦
قامت ملاك تلعب.. وفجاة .. بعد دقايق ..سمعنا صوت صراخ قوي من اوضة الاولاد .. ورحنا نشوف شو في وقلوبنا مو بمحلها
الجزء التالت
قمنا بسرعة متل المجانين نستكشف الصوت ونطمن على الاولاد 😮 ومتل ما قلبي كان حاسس.. ملاك واقعة عالارض وصوت صراخها واصل لتحت ..كل الرجال اجتمعوا وصاروا عنا بالغرفة.. ملاك رجلها متنية وواقعة المروحة الحديد عليها .. رفعنا المروحة بسرعة وقربت امها لتعدل رجلها بطريقة غلط وهي عم تولول
-لينا : تمام لا ما تمسكيها هيك هلء بتنسكر او بتتعطل رجلها 😮
تمام : انت بالذات ما تتدخلي بعددددي .. مية مرة قلتلك طالعي نفسك من البنت .. ما رح تملي عينك الا لتموت بنتتتي 😡
لارا : تمام شو عم تحكي .. لينا شو دخلها ؟ كل الصغار بيوقعوا
ابو ملاك : هلء مو وقت خناقاتكم رح اتصل بالاسعاف بعدوا هيك بعدوا
..
دموعي بلشت تنزل متل الشلال وما عاد حسيت على حالي .. الكلام كان قاااسي كتير 😯😢 حسيت بايد ايمن الحنونة كمشني وقربني لعنده
- حبيبتي طولي بالك .. انا رح دفعها تمن هالكلام بس لنطمن عالبنت
..
انا كنت كتير قلقانه على ملاك .. اخدوها عالمشفى و جبسولها رجلها و بعد شي ساعتين رجعت عالبيت .. انا وقتها كنت ببيتي بس عم اطمن على ملاك بالتليفون مع لارا سلفتي التانيه ...
كان يوم عيد اسود بالنسبه الي مع اني كنت كتير عم حاول انسى وفرح حالي .. قلي ايمن انه ننزل نتعشى برا وننبسط بس انا رفضت وفضلت اني نام ما بدي شوف حدا .. حكيت مع امي بالليل وعاتبتني اني ما اجيت .. خبرتها بيلي صار وقلتلها بشوفك بكرا ..
بالليل نمت و دموعي على مخدتي .. ايمن حاول يقرب مني ويصبرني
- لينا بدك تضلك تبكي يعني ؟ بدك تحرقيلي قلبي 😢
-لا ما عم ببكي 😯
-لكان شو هدول الدموع .. انا اسف اني عم خليك تسمعي هالكلام . اسف لاني حارمك من الاولاد بس هاد....
- لا تكمل .. كم مرة قلتلك بلا هالكلام 😓
-بس انت مو مضطرة تسمعي هيك كلام مو مضطرة ما تسمعي كلمة ماما بسببي .. احنا عملنا اكتر من مرة طفل انابيب وفشلت يعني ما في امل مني ابدا 😢
-هاي ارادة الله .. انت مالك علاقة ..
- انا قلتلك لو بتحبي نترك بعض مشان ....
-خلص ايمن خلص انا بحبك وما بدي اتركك 😯
-الله يخليلي اياك😍
....
هيك كانت حياتي كلمة من هون و تعليق من هون وابتسامة حزينه و دمعة مدفونه وما بفكر بشيء غير بموضوع الاولاد .. وحياتي واقفة وما فيها جديد .. لحتى اجا هداك اليوم يلي غير حياتي للابد 😐
الجزء الرابع
كنت قاعدة عم بندب حظي وبتذكر على كم دكتور رحت وكم واحد فحصني واديش اخدت علاجات لمدة عشر سنوات واديش تغير جسمي وصرت سمينه من ورا عمليات زراعة اطفال الانابيب 😯 اديش اسمعت تعليقات بايخة و اديش لسه نفسي بطفل و ما رح حس بالحياة الا لجرب شعور الامومة .. وقفت قدام المرايا وصرت اطلع بحالي .. .. حطيت مخدة على بطني وصرت امشي متل الحوامل ومثل اديش تعبانه ومهدودة .. يالله متى اولد .. صحيت من الحلم على رنه التلفون .. انتبهت انه هالشيء مو حقيقي .. كمشت المخدة وضربتها بالارض وصرت خبط عليها برجليا وصرخ ... كمشتها مرة تانية وبدموع عيوني :
اسفة يا بنتي اسفة 😢😢 سامحيني ..
رن التلفون مرة تانية .. مسحت دموعي وفتحت الخط .. كانت رفيقتي سوسن .. بدها تعايدني وقال عاوزتني بموضوع .. قلتلها انا اليوم رايحة على اهلي بخلص منهم وباجي لعندك لانه بيتها قريب كتير من اهلي ..
لبست تيابي و طلعت انا وايمن على بيت اهلي .. عايدنا امي وابي وقعدنا سوا فترة بعدين طلع ايمن يشوف رفقاته .. اخي الصغير ومرته متجوزين عند ابي بالبيت و عندن بنتين متل القمر ..مرت اخي منيحة بس ما بتحسب كلامها يعني قلبها طيب بس بتدج كلامها دج .. كنا قاعدين وكانت قايمة قاعدة عم تلبس بناتها وتاكلهم وتلاعبهم بعدين اجت وقالت لاخي
مرة اخي :حبيبي خد البنات عني شوي والله تعبوني
اخي : ايه خلص نيميهم والله ملينا من نقهن😡
لينا : يؤبشوني ما في احلى منهم 😍
مرة اخي : نيال قلبك يا لينا .. عنجد نيالك ما عندك اولاد و مسؤولية .. والله انت بنعمة كبيرة
..
هالكلمات جرحتني و زرعت بقلبي سكين .. كتير كنت اسمع هالجمله والكل بيفكر حاله عم يواسيني بس بترجاكم ما حد يحكي هالكلمة لوحدة متلي لانه اسوا من المسبة .. يا ناس انا متمنيه اتعب متلكم .. متمنيه اسهر طول الليل جنب ابني احضنه وضمه .. مستعدة ما نام ولا دقيقة بس هو يكون بحضني .. ما بدي شي من الدنيا الا ريحته 😦😦 بيكفي بقا حسووووا ..
..
طلعت من بيت اهلي و رحت شوف رفيقتي سوسن واعرف شو الموضوع يلي عاوزتني فيه .. وصلت لعندها .. سلمت عليها وقعدنا شوي واطمنا على بعض
- ايه سوسن خير بشو كنتي عاوزتيني
- لينا انت لامتى بدك تضلك هيك؟؟
- ليش شو بني انا ؟😯
- بدك تضلك دافنه حالك هيك.. ما عم تساوي شيء مهم بحياتك
- وشو بايدي انه اعمل يعني ؟
- لك انت مو دارسه تربية طفل بالجامعة 😐
- ايه ؟
-طيب استغلي دراستك
-ما ليكني عم استغلها شبك ؟ عم ربي اولادي السته
-عم تتمسخري يعني مو ؟
- سوسن كرمال الله شو بدك مني ؟ بدك اياني اطلع اشتغل و ربي اولاد الناس واتحسر .. حاج تموتوني حاااج 😢😢😢😥
- عمرك ما رح تتغيري بدك تضلي ضعيفة وتستني الفرج
- هلء انت جايبتيني هون لتفتقيلي جروحاتي ؟؟
- قومي يلا قومي
- لوين
- بدي عرفك على رفيقة الي تعرفت عليها من فترة قصيرة عالنت ..
- مو جاي عبالي اتعرف على حد .. هلء بتقلي اولادي عملو واولادي ساوو وكم ولد معك ؟؟ خلص اتركيني ما بدي شوف حدا
- ايه قومي خلصيني بلا لعي 😕
شدتني سوسن من ايدي وقالت لبنتها الكبيرة تدير بالها على اخواتها وقفلت الباب وطلعنا ..
بالسيارة ما جاوبتني على ولا سؤال وانا متل الجدبه ما بعرف وين اخديتني بس انا بثق بسوسن كتير وبعرف انها بدها تفيدني ..
وصلت لمكان كتير كبير .. شو هاد .. فتنا لجوا .. كان كله اطفال .. وين ما فتلت وجهي بلاقي صغار .. اطلعت على يافطة فوق : دار الامل لرعايه الايتام
زورت سوسن وسالتها : ليش جايبتيني هون .. شو بدك اتبنى طفل يعني ولا بدك .....
ما خلتني سوسن كمل كلامي .. سحبتني من ايدي وفوتتني غرفة المديرة ..
سلمنا عالست الموجودة .. صبيه تقريبا بنفس عمري
عيونها خضر وشعرها بني فاتح وسمينه شوي مليانه يعني وطولها حلو .. فاردة شعراتها وحاطة مكياج ناعم ولابسه طقم رسمي اسود كتيرر اكابر☺ اول ما شفتها ارتاحتلها كتير .. رحبت فينا وعرفتنا على حالها
ميادة : انا ميادة عمري 37 سنه مديرة هالمكان الجميل
سوسن : وانا سوسن بتعرفيني ربة بيت 😊
ميادة : والمدام ؟
لينا : انا لينا ربة بيت برضو ...
ميادة : مية اهلا وسهلا نورتو المكان .. شو رايك مدام لينا تتفرجي عالمكان والاطفال يلي عنا ؟؟
لينا : ايه ما في مانع
قمنا انا وسوسن والست ميادة ناخد جوله بالمكان .. تبينلي انه المكان فيه تقريبا 7 غرف وحوالي 100 طفل و15 مربيه كل وحدة الها اختصاصها ومن ضمن المربيات في مدرسات و معلمات اتيكيت .. كلهم كانوا صبايا صغار عم يشعوا نشاط وحيوية 😍 حسيت باريحية بالمكان .. كانت ميادة عم تورجينا الاولاد .. هاد امه وابوه ماتوا بحادث سيارة وهاي لقوها مرميه على باب الميتم و هاد جابته امه خوف من الفضيحة وما بتعرف ابوه وهاي سلموها الشرطة لانها نتيجة زنا محارم وما بتتقيد وهاد امه ماتت وهي عم تولده وابوه تجوز وسافر و سلمه هون .. قصص بتشيب .. بكيت وانا عم شوف هالوجوه البريئة يلي شافت كل هالعذاب .. تسموا لقطاء بس من غلطة ام و اب ما عندهم ضمير .. يالللله انا عم بتمنى ظفر طفل و هدول هيك بيرموا اولادهم .. شو هالمفارقة 😯
رجعنا قعدنا بالمكتب وبلشت الست ميادة تحكي عن نفسها ...
- انا يا ست لينا الله ما اعطاني اولاد .. وكنت عم موت كل يوم وانا استنى الله يفرجها .. كل شهر كنت اتعذب واحسب للشهر اللي وراه .. دعيت كتير الله يعطيني ولسه عندي امل .. كانت عندي شويه مشاكل وعالجتها بس ما صار حمل ... قررت بعدها اني ما وقف حياتي على هالموضوع .. يعني ما رح ضل كل شهر استنى واندب حظي وبالاخير ما عم اعمل شيء مفيد ..بالاخير قررت افتح هالمكان يلي كان صغير بس بجهود اهل الخير كبر الحمد لله ..بنفس الوقت عم اتعالج واخد بالاسباب .. عم ساوي شيء مفيد لبين ما ربنا يكرمني ☺ ليكني عايشة بين االاطفال .. انا عندي طاقة وامومة كتير فظيعة وهدول الاطفال بحاجتها .. ليش ما عوض النقص اللي عندهم بالفائض اللي عندي .. شو رايك ؟؟
يالله ما اروع كلامها .. ما كنت حابه انها توقف حكي ابدا .. كنت بدي ضل اسمعها .. كلامها كان بلسم .. يالله ما اقواها .. ياريت في كون متلها ياريت
الجزء الخامس والاخير
يعني هالست عندها نفس مشكلتي و معاناتي و مع هيك انا مبينه اكبر منها بمية سنه .. الشحوب اللي بوجهي والسواد اللي تحت عيوني والانكسار اللي بنظراتي مو موجود عندها ابدا .. بعد شي ساعتين رجعت عالبيت وهالانموذج ما بتروح من بالي 😍 قوتها وصلابتها بينضرب فيهن المثل .. حكيت لايمن عنها وانه اديش قويه وانه موضوع الاولاد ما وقف حياتها وانه هي انسانه منتجة .. كنت عم احكي عنا بكل اعجاب وفخر .. ايمن كان مبسوط لاني مبسوطة وقلي انه زورها كتير واتعرف عليها اكتر طالما انا معجبة بشخصيتها لهالدرجة .. وفعلا هيك صار بلشت اتردد لعندها كتير واخدت رقم موبايلها وصرنا نتواصل وبكل مرة شوفها تعطيني دافعية كتير كبيرة وتجدد الامل جواتي 😍
- لينا انت دارسه شيء؟
- ايه درست دبلوم تربيه طفل
-طيب حلو كتير شو رايك تشتغلي معنا هون ؟ بنستفيد منك وانت بتستفادي من حالك ومن خبراتك المدفونه .. خسارة ما تكوني عم تفيدي بلدك وانت قادرة
- شو بدي اشتغل هون ؟
- بتمسكي مجال من المجالات وفئة عمريه معينه.. انت شفتي الدار واقسامها .. رح اتركلك الاختيار
- طيب انا ....
- لا تترددي .. بدل ما تربي طفل واحد .. ربنا رح يعطيك فرصه تربي عدد كبير وتكوني امهم .. ومتل ما بتعرفي : ما اخذ الله منك شيئا الا ليعطيك
- والنعم بالله رح شاور زوجي وردلك خبر☺
رجعت عالبيت وحكيت لايمن .. بالاول تردد وقال انه هالشغل متعب و رح واجه ناس اشكال الوان .. بس انا خبرته انه ميادة كتير حبابه وحتساعدني وانا لازم كون قويه متلها وهالشغل رح يقويني .. طلب ايمن انه يشوف المكان ويتعرف على ميادة مشان يتطمن علي .. وفعلا هيك صار .. والمكان عجبوا و وافق اني بلش شغل 😊☺😊☺
ميادة انبسطت كتير انه وافقت وطلبت مني انه طلع كل الطاقة الحلوة اللي عندي واستغلها بالتعامل مع هالوجوه البريئة
- باي قسم بتحبي تشتغلي ؟
- مع الصغار كتير .. اصغر شيء عندك .. البيبيات يلي لسه جسمهن طري و ريحتهم حلوة ..
-معقول ؟ الكل بيهرب من هالفئة بيقولو متعبة
- بس انا بدي اياهن 😢بدي امسكهن من اول ما يولدوا وعيش كل مراحل طفولتهم .. بدي شربهم حليبهم و خاف عليهم يتشردقوا واحضنن وضمن .. بدي عيش اللحظات 😯
- حاضر بتؤمري .. ورح تكوني مسؤوله عن هالقسم
-مسؤؤله من اولها ؟
- ايه انا واثقة فيك وبقدرتك ☺
فتت عالقسم كان حوالي 7 اطفال بيبيات كتيرر ومعهن مربيتين .. مسكت اول بنت كانت عم تبكي .. لمستها وانا عم برجف .. يارب .. هاد اول طفل امسكه براحتي وما تكون امه خايفة عليه من عيوني 😢 اول طفل ما يخطفوه من ايدي بسرعة ويقولولي صلي عالنبي .. سالت المربيه عن اسمها قالتلي مريم .. مريم .. يالله ما احلاكي
ضميتها لصدري منيح وكنت عم شم ريحتهااا واتنفس نفسها .. يارب لا اعتراض على حكمك .. بتعطيهم للي ما بعرفوا قيمتهم ..
صرت كل يوم اجي للدار بكل شغف مشان اشوف الاطفال وبالذات مريم ..
علاقتي بميادة كانت عم تزيد ☺ صارت رفيقتي يلي بسرلها بكل شيء .. وما كنت استحي احكيلها شيء لانها اكيد حاسه فيني وبمعاناتي ..صرنا نطلع سوا وشوف قديش ردودها قويه للناس يلي بتعايرها بالخلفة .. ما كان حد بيقدر يكسرها كانت ترد بكل قوة وما بيرفلها جفن .. وهالشيء تعلمته منها وصرت شوي شوي قادرة واجه هالمجتمع المريض ..
بلشت اهتم بحالي متل ميادة .. سجلت بنادي رياضه ووزني بلش ينزل وهالشيء اعطاني ثقة بنفسي .. صارت تاخدني ميادة على صالونات التجميل معها ويوم عن يوم عم صير احلى واقوى .. الولد ما رح يبنيني انا اللي بدي ابني حالي وكون انا 😍
وبيوم رجعت عالبيت كان ايمن كتير سعيد ..
- حبيبيتي انا مبسوط بالتغيير الحلو اللي انت فيه .. نفسي روح لميادة واشكرها انت صرتي اروع واروع بيكفي اني ما عدت شفت الحزن بعيونك
- الحمد لله حبيبي
- الك عندي خبر حلو .. انا اليوم رحت لدكتور جديد وكتبلي كورس علاج وخلطة سحريه وقلي انه لازم التزم فيها فترة وانه ممكن النسبة عندي تعلى و تصير مثلا خمسه بالميه ووقتها ممكن نعمل انابيب وتنجح
- انابيب مرة تانية 😮 انا تعبت 😢
- حبيبتي ما رح خليك تعملي شي الا لما الدكتور يقلي احتمال النجاح كبير جدا باذن الله
-ان شا الله خير ☺
بلش ايمن بكورس العلاج .. وانا توكلت على الله وكنت مقضيتها استغفار ودعاء لرب العالمين يعطيني .. بنفس الوقت كان شغلي بالدار رائع وعطائي كبير بشهادة الجميع .. كل شيء فيني تغير للاحسن .. وبعد شهرين تقريبا صرت مسؤؤله عن قسمين بالمركز و دوري كبر .. سوسن كانت عم تزورني ومو مصدقة عيونها ..
سلفتي تمام غيرتها زادت بس بطلت تقدر تحكي ولا كلمة لاني كنت ردلها الكلمة بعشرة .. راح زمن الابتسامة والانكسار .. وبنتها ملاك رجعت لاعبها ولساتني بحبها وهاي كانت ضربه لالها انه كلامك ما بيفرق معي 😕
وبيوم كانت المفاجاة كبيرة .. ايمن خلص العلاج وعمل فحص والحمد لله كل شيء منيح وقررنا نعمل عمليه الانابيب التالته .. كنت كتير خايفة ..ميادة قوتني وقالتلي لازم ناخد بالاسباب ..
عملت العمليه وبعدها الارجاع ..وبعدها اسبوعين مروا علي متل النار وانا عم استنى كل لحظة اني اسمع احلى كلمة بحياتي .. يارب لا تذرني فردا وانت خير الوارثين .. يا ودود يا ودود يا ذو العرش المجيد يا فعال لما تريد اسالك بقدرتك التي قدرت بها على جميع خلقك وبنورك الذي انار اركان عرشك وبرحمتك التي وسعت كل شيء .. يااااا مغيث اغثني .. اللهم اجعل في بطني ولدا صالحا سليما معافى انه عليك لهين اذا اردت شيء ان تقول له كن فيكون ...
الحمد لله ربنا كان سميع قريب مجيب الدعاء ... حللت وطلعت حامل .. سمعانين حامل ... انا حامل .. ربنا استجاب الحمد لله
كرم ربنا كبير ... اخدت اجازة من الدار وارتحت مشان الحمل ... والحمد لله الله اكرمني فوق ما بتصور .. توامين : كريم وهبة
فرحتي ما بتنوصف الحمد لله ..
حابه قول لكل وحدة عاشت وعم تعيش تجربتي : عيشي ووكلي الله و اتركيها على رب العالمين وربنا ما بينسى حد
بحبكم
انتهت...

شاركه

عن غير معرف

هذا النص هو مثال لنص يمكن ان يستبدل في نفس المساحة ايضا يمكنك زيارة مدونة مدون محترف لمزيد من تحميل قوالب بلوجر.