لانك حبيبي.....

لانك حبيبي.....
بقلم الكاتبة هنادي العماوي

الجزء الاول
السعادة كلمه كتير كبيرة ومعناها ما بينشرح بس بينحس .. حلوة كتير وقت تحس فيها بس اصعب حقيقة انه مستحيل السعادة تدوم لاي انسان 😯 هي ضيفة لطيفة لوقت محدد لازم انت تستغلها وقت تجي لعندك وتفرح قد ما فيك،، لانك بتعرف انه رح تيجي لحظة وترحل هالضيفة والله وحده بيعلم متى ممكن ترجع 😑
- بلال عنجد عم تحكي .. انا كتير مبسوطه 😁 انا اسعد انسانه بهالكون
- ايه حبيبتي جد .. انا مو ممكن اخلف وعدي معك .. صارلنا 4 سنين بنحب بعض وطبيعي يكون الزواج نهاية هالحب
- نهاية الحب !! هلء هيك ؟ بدل ما تقول تعميق للحب او توثيق اله 😕
- هلء انا ما بعرف احكي متلك ولا انتقي مصطلحاتي يا انسه بس اللي بعرفه كتيررر منيح اني بعشقك .. والله بعشقك 😍 يا حلا
- طيب خلص صدقتك لا تحلف 😀 متى جايين بكرة ؟
- يعني ان شا الله هيك مع المغرب
- اهلين وسهلين وانا رح خبر ماما 😄
رجعت عالبيت وقلبي عم يرقص من الفرحه وطيور الحب عم تحملني لاحلى حلم استنيته من سنين .. خلص انا وبلال رح نتزوج .. بتذكر كيف تعرفنا صدفه ببدايه الجامعة وطلع ساكن بمنطقتنا وقريب شوي من بيتي وكيف صديته كتير وهو ضل وراي لحتى حبيته .. حبيته لاخلاقه ولروحه الحلوة ولاسلوبه الحلو مع الكل .. حبيت طيبة قلبه وحنيته وحبه الي .. كان دايما يوعدني كون مرته وام اولاده وانا فعلا مصدقته وواثقة فيه وليكه الوعد حيتنفذ الحمد لله 😊
وصلت البيت وخبرت ماما يلي كانت بتعرف بالموضوع لاني ما بخبي عليها شيء .. ماما فرحتلي كتير بس زعلت لاني رح اتزوج والبيت رح يفضى عليها .. انا الي اختين بنات تزوجوا وانا الصغيرة وابي توفى لما كان عمري 6 سنين .. ماما ربتنا وكبرتنا وعلمتنا وكانت النا الاب والام و الله يقدرنا ونردلها هالجميل ..
بهالليله ما نمت وانا عم فكر امتى رح يجي بكرة .. كيف رح استقبل اهله لبلال .. شو رح البس ؟ كيف لازم احكي ؟ يا ترى اهله كيف تعاملهم؟ طيب معقول ما يحبوني .. كل هالهواجس كانت عم تدور بعقلي ..
نمت شيء ساعتين وفقنا فجاة على صوت انفجار كبير هز المنطقة كلها .. قمت مرعوبه 😱 شو هاد ؟رحت على غرفة امي بسرعة واطمنت عليها .. الحمد لله كانت بخير .. بس الصوت كتير فظيع .. الله يلعن الحرب ! الله يستر وما يكون حد انأذى ..
دقيت على بلال مشان اطمن عليه ما رد .. رجعت دقيت مرة تانية وتالته ورابعة .. قلبي صار متل النار .. معقول صار شيء عند بلال .. الله يستر يارب .. دقيت رقم هالة اخت بلال يلي عرفني عليها طلع موبايلها مغلق .. طيب والعمل ؟ رجلي ما عاد حملوني 😯 صرت ارجف .. ماما كانت عم تهديني وتقلي وكلي الله ان شا الله خير .. كانت الدنيا ليل وصوت الانفجارات زادت .. صرت ابكي وابكي وعيوني كلها دموع .. الوضع صارله فترة هادي .. كيف فجاة صار هيك ..
ساعات الانتظار كانت كتير صعبه علي .. طلع الصبح وبلش الفجر يشق نوره ..طول الوقت كنت عم دق لبلال وبعد شيء 3000 رنه رد حبيبي
- الو بلال انت منيح طمني 😳
- ....... ايوة
- بلاال احكي حبيبي طمني شبك ؟ صاير عندكن شيء ؟
- اخي عمر استشهد يا حلا اخي مات
- ياربببي عنجد عم تحكي 😮😮😯
- انصاب بالانفجار الكبير اللي صار اول الليل وقبل ساعتين استشهد
- حبيبي طول بالك الله يرحمه يارب هدي حالك
- هدي حالي ؟ ما انت بتعرفي انه عمر مو بس اخي .. لك رفيق عمري .. ااااخ ياربي دخيلك
- امانه لاتبكي بلال امانه
-...... .
- الو بلال الو .. وين رحت ؟؟
قفل الخط وما عاد رد علي .. انا بعرف شو يعني عمر ؟ بعرف اديش بيحبو بعض .. عمر صرلو متزوج بس 6 شهور يعني عريس لسه ما فرح 😯 ربي يصبر قلبك يا بلال .. صرت ابكي وابكي و دموعي ما وقفت .. خبرت ماما وزعلت من قلبها بس قالتلي هاد قدر رب العالمين وما لازم نعترض ..
بعد شوي الوضع هدي والانفجارات كلها وقفت وما عاد في ضرب ..لبست انا وامي ورحنا على بيت اهله لبلال مشان نعزيهم بما انه اخته هالة رفيقتي ..
وصلنا هنيك .. كات الوضع بيبكي .. ام عمر متل الجثة الهامدة لا حركه ولا نفس ولا دموع .. هالة نايمه عالارض كامشة حالها متل وضعيه الجنين وعم تبكي وتئن بصوت مسموع .. مرت عمر العروس الحلوة ما كان مبينلها عيون من كتر البكا .. الناس حولهن عم يهدوهم ويواسوهم بس هنن مو حاسين بشيء 😢
قربت عند هاله وحاولت احكي معها
- طولي بالك حبيبتي هاد شهيد عند رب العالمين .. وربنا اختاره لانه بحبه الله يرحمه
- بترجاكم اتركوني اتركوووني ما حد يقرب مني .. ما حد يحكي معي بعدووو عني 😢😢😢
بعدت عن هاله .. حاولت شوف بلال باي طريقة بس ما صحلي لانه كان عند الرجال .. رجعت عالبيت وقضيت نهاري بكا .. هاليوم يلي المفروض يكون اسعد يوم بحياتنا انا وبلال انقلب لعزا .. سبحان الله كيف القدر ..ما حد بيعرف شو مخباله 😯
تاني يوم ما رحت عالجامعة .. دقيت لبلال كتير وما رد .. اكيد ما عم يرد على حدا ووضعه كتير صعب بس انا مو حدا لازم وقف جنبه بهالمحنه الكبيرة ..
ضليت دق طول نهار وما رد .. باليوم اللي بعده نفس الشيء .. بلال ما عم يرد علي .. اكتر من تلات ايام وانا على هالحاله .. طيب ليش هيك عم يعمل فيني ..
كنت قاعدة وعم فكر .. وصلتني مسج عالموبايل .. فتحتها .. هاي من بلال الحمد لله يارب .. بلشت اقرا
" حلا انا حبيتك من كل قلبي والله بيعلم شو معزتك عندي بس انا ما بدي اظلمك معي .. نحنا مو لبعض يا بنت الناس .. انا بطريق وانت بطريق .. الله يوفقك بحياتك "
😮😮😮😮😮😮😮😮😮😮😮😮😮😮😮😮
الجزء التاني
ما صدقت حالي شو عم بقرا .. رجعت قرأت المسج مرة تانيه ..لا لا في شيء غلط .. كانه عم يقلي نحنا مو لبعض .. اكيد عم يمزح ايه عم يمزح 😮😮😮
ليش هيك ؟؟ دقيت على موبايله لازم افهم القصه .. صرت ابكي ودق .. دموعي غرقت الموبايل .. ما كان يرد .. فتحت الفيس لقيت صحابه عم ينزلوله تعازي وهو كاتب بوست انه مخنوق وانه الدنيا تسكرت بوجهه والكل عم يواسيه..
كتبتله مسج
- انت شو كاتبلي ؟ هاي الرساله بالغلط .. مو الي ..صح؟ رد علي وفهمني .. مو معقول تنهي كل شيء بمسج .. بدي افهم .. بلال انا بعرف انك مضغوط بس ارجوك رد علي وفهمني 😢😢
بعد شيء ساعتين من الانتظار وكل شوي راقب رسائل الفيس لقيته رادد علي وكاتبلي :
- حلا خلص كل شيء انتهى .. انت اللي ارجوك تفهميني
- لك شو بدي افهم ؟؟ شووو
- انت بتعرفي انه اخي عمر ما صارلو متزوج الا كم شهر ومرته لسه عروس
- ايه وشو يعني ؟؟ 😮
- مبارح حللت وطلعت حامل .. يعني ما بنفع ترجع عند اهلها
- ليش ما ترجع عند اهلها يعني ؟
- حلا من الاخر .. هاي كانت مرة اخي وحامل بابن اخي وانا لازم اتزوجها مشان الولد
- شوو 😮😮😮😮 يعني هنن ضغطوا عليك تتزوجها
- لا بس انا بحبه لاخي ولازم ربي ابنه ما رح خلي رجال غريب يربيه .. سامحيني .. انا رح ضل حبك طول العمر بس هاد القدر
- القدر ؟؟ هاد الاستسلام .. هاد التخلي والهروب هيك اسمه على فكرة
- بتعرفي اني ما بعرف استخدم مصطلحاتك .. الله يوفقك بحياتك
...
خلص يعني انتهي كل شيء .. الحب مات .. ما عاد بده اياني .. انا بكابوس .. بدي فييييق منه .😣😮😣
اجت امي على صوت صراخي .. صارت تهديني وتحاول تفهم القصه
- حلا حبيبتي شبك يا بنتي اهدي😮
- خلص ماما شوفي شوفي شو كاتبلي 😣
قرات ماما المحادثه ..
- الله لا يوفقه .. هيك بهالسهوله بيتركك
- لا تدعي عليه ماما 😢
- خلص اهدي وغسلي دموعك ما بستاهلهن وبكرا بتاخدي سيده انت ما في منك
- ما بدي حد ما بدي حد بدي مووت
...
كانت فترة عصيبه عم مر فيها وقلبي مجروح و ما عم اقدر عبر .. هلء لازم اكرهه .. بس ماني حسنانه .. انا بحبه وهو كل شيء بحياتي .. كيف بدي انسى كل لحظاتنا الحلوة سوا .. كيف بدي اقتل الحلم و كمل حياتي ..
صرت اتذكر شكلها لمرة المرحوم عمر .. البنت كتير حلوة بيضه متل التلج وعيونها واااسعه ولونها عسلي وجسمها كتير متناسق ..اكيد بلال رح يحبها .. اكيد .. 😢
وانا خلص راحت علي .. ضليت فترة على هالحاله وما عم احسن ارجع لحياتي الطبيعيه .. خلص السعادة ودعتني وما عاد في امل بالحياة .. بالنسبه الي كل شيء انتهى باللحظة يلي تركني فيها بلال😣
بعد بكم يوم رجعت داوم بالجامعه .. بلال ما كان يجي .. برغم كل شيء بس كان نفسي شوفه .. بلشت الامتحانات .. هالفصل تخرج .. بس برضو بلال ما اجا ولا قدم معنا .. يظهر نفسيته كتير تعبانه 😢
خلصوا الامتحانات وكل شيء تمام قعدت فترة بالبيت ما عم اعمل شي بعد التخرج .. وبيوم اطلعت غير جو مع رفقاتي ..رجعت عالبيت لقيت ست كبيرة وبنتها قاعدين عم يستنوني عرفت انهم خطابين .. طبعا انا ما كنت طايقة حالي ولا طايقة حد .. سلمت عليهم وفتت لغرفتي .. بعد شوي راحو الجماعة
اجت ماما لعندي وقالتلي انهم ساكنين بمنطقتنا وابنهم شافني اكتر من مرة وانه العريس دكتور اسنان واسمه راضي وعمره 28 سنه وما في شي ينعاب
- ماما انت عنجد عم تحكي .. هلء انا بوقت انخطب واتزوج 😣 ما انت بتعرفي كل شيء
- ايه يا جدبه هلء وقتها .. اتزوجي واثبتي للكل انك بتاخدي احسن منه لبلال الزفت و رح تصيري مرت الدكتور
- ماما انا ما بفكر هيك .. ما باخد واحد مشان غيظ واحد تاني
- حلا فكري منيح انت هلء تخرجتي ولازم تتزوجي .. لا تضلي تبكي عالاطلال .. هو باعك وانت بدك تضلك عايشه عالذكرى😕 كم شهر صارلك وهو حتى ما فكر يسال عنك
- ماما مشان الله خلص مشان الله
ماما كانت عم تزن طول الوقت .. صارلي 8 شهور مو شايفة بلال .. عرفت ماما من ناس جيراننا انه مرة اخوه ولدت وخلصت عدتها وتزوجوا عالسكت وهلء عايش معها بشقة اخوه بنفس عمارة اهله 😢
هالخبر كان صاعقة بالنسبه الي .. قررت شوف الدكتور راضي ..
وبالليل اجو لعنا .. كان شاب شكله محترم لابس طقم رسمي ونظارات طبي سمين شوي وطولو وسط .. ملامح وجهه مقبوله بس كتير جامدة .. بيحكي بطريقة كتير اكابر .. قعدته وحركاته وكلامه كله بيدل على اكابريته وانه فعلا دكتور محترم ..
قلبي ما لهفله بس يمكن لانه لساتني متعلقه ببلال .. فكرت منيح منيح وبالاخر اخدت قراري ..
رح اتزوج راضي 😢😯
الجزء التالت
اخدت قراري وبلغنا الجماعة انه موافقين .. خطبت وبلشت حياتي الجديدة.. غيرت رقم موبايلي وعطلت فيسي القديم .. راضي كان منيح معي من الناحيه الماديه ما كان يعز علي شيء بس كنت حسه تقيييل كتير وما عم يعبرر عن مشاعره ابدا .. اشتهيت شيء مرة يقلي بحبك او طاير عقلي فيك او بعشقك متل ما كان بلال يقلي .. المقارنات كانت عم تشعل الغيرة بقلبي .. اكيد بلال عم يقول هالكلام لمرته 😢 وانا محرومه منه .. حكيت لماما انه راضي كتير جلف .. قالتلي هاد دكتور ومعبي مركزه مانو ولد صغير بدو يلعب معك وانه لازم تكبري عقلك 😕
كانت طلعاتنا انا وراضي مو كتير يعني صارلنا شهرين مخطوبين وما طلعنا الا مرتين ..
وبيوم اجا اخدني من البيت المسا وقال بدنا نتمشى .. فرحت كتير وقلت الحمد لله اخيرا بلش يحس فيني .. بالطريق مسكت ايده وقربت عليه .. فلت ايده بسرعة اطلع فيني بغضب
- حلا عيب هالحركات بالشارع شو صارلك شو نحنا ولاد صغار 😡
- راضي انا ما عملت شيء 😯عالعموم انا اسفه
حبست الدمعه بعيوني ومشيت ومشان تكمل معي فتنا عمطعم مشان نتعشى واذ بمفاجاة كبيرة كانت عم تستناني .. بلال ومرته عالطاوله اللي جنبنا .. بالاول ما انتبهت .. رفعت عيوني واطلعت لفوق واتنهدت من قلبي لاني مو مبسوطه ابدا بالطلعة .. لقيت في عيون عم ترصدني وعم تطلع في بكل حزن وحسرة .. هاد بلال .. هاي عيونه يلي بحبها .. اطلعت في للحظة ورجعت نزلت راسي والدمعة مخنوقه بعيوني
- راضي ،، حاسه انو المحل مو ظريف في مجال نغيره😯
- حلا على فكرة شكلك ما بتعرفي بالاتيكيت ابدا .. كيف بدنا نفوت لمحل ونقعد ونحجز طاوله وفجاة نقلهم بخاطركم ما ناسبنا 😕 بعدين المكان كتير ظريف
- طيب متل ما بدك خلص اذا انت مرتاح اووك 😑
..
كنت كل ما ارفع عيوني لاقي بلال عم يطلع في .. رفعت ايدي اليمين قدام وجهي وتعمدت اني وريه الخاتم .. وصرت اضحك مع راضي مشان حسس بلال اني مبسوطه ومو بكيانه عليه ..بس انا من جواتي كنت عم موووت ...
اتعشينا انا وراضي و حاسب واجينا نطلع من المحل .. بلال ومرته طلعوا بنفس الوقت .. كان ابنها بحضنها وكان جمالها واضح كتير .. بلال مسك ايدها وطلع قدامنا ... هالحركه حرقتلي قلبي ونزلت دمعتي .. ما قدرت احبسها هالمرة ..😯😢
استمرت خطبتي 3 شهور وبعدها كان موعد العرس .. هاليوم يلي المفروض احلى يوم بحياتي كان يوم خالي من المشاعر ..لبست فستاني الابيض وكأنه كفني .. ما قدرت حب راضي ابدا ..
تزوجت وبلشت حياتي او بقدر قول مماتي .. اول يومين كانو مناح متل اي تنين عرسان .. بيتي كان حلو وجاهز من كل شيء والكل حاسدني على هالجوازة الدهب .. بس ما حد حاسس بيلي جواتي ..
راضي رجع لشغله وصار طلع من الصبح للضهر عالمشفى ومن العصر للعشا بعيادته الخاصه .. انا كنت قاعدة بالبيت لا شغلة ولا عملة .. قضي نهاري عم استناه .. كنت حضرله اطيب الاكل والبس احلى لبس و بس يرجع ياكل اللقمه وينام .. ما كان حاسس فيني ابدا .. انا مليت من هالعيشه وفاتحته اكتر من مرة انه انا تعبانه وحاسه حالي وحيدة
-راضي انا تعبت .. هاي مو حياة نفسي شوفك
- شو يعني ست حلا .. بدك اترك شغلي واقعد جنبك .. انت تزوجتيني وبتعرفي طبيعة عملي
- بس فيك تخصصلي شويه وقت .. مو كل وقتك للشغل😯
- خلص بفضي حالي يوم وبنطلع هلء اتركيني انام
كل مرة كان يقلي هالكلام .. بس عبث ما بيفضى ولا بنطلع .. جربت اعمل تغييرات كبيرة بشكلي .. صبغت شعري احمر و عملت مكياج سموكي ولبست لبس غريب مشان الفتله نظره .. اجا بالليل وانا كنت عم استناه .. فتحتله الباب
- هلا حبيبي يعطيك العافيه
- اهلين .. لك شو هاد اللي عاملتيه بحالك 😂 ليش هيك ؟ غيريها هالباروكه مو حلوة طالعة بترعبي
-بس هاد شعري مو باروكه
- طيب يلا مو مشكله
- شو حبيت الاسود علي اكتر 😯
- لا عادي كله منيح .. حضريلي لقمه بدي اكل و اتصفح نت شوي بكرة عندي محاضرة بدي القيها بمؤتمر ولازم حضرلها منيح
-حاضر 😢..
..
وهيك كانت حياتي مع راضي لا اهتمام ولا مشاعر .. شكيت لامي قالتلي
- حلا انت لا عاجبك العجب ولا صيام برجب .. يا امي الرجال منيح لا عم يهينك ولا عم يضربك وموفرلك كل شيء لا تدلعي بقا لو صحت لابوكي ما مات 😕
- بس بارد كتير يا ماما .. والله المشاعر اهم من الاكل والشرب والمصاري .. نفسي يحس في
- حبيبيتي ما في رجال ما عنده عيوب احمدي الله انه بس هاد عيبه لجوزك .. في رجال بيشتموا نسوانهن وبيضربوهم وبيحبوا عليهم .. بس انتي شغلتك بسيطه 😕
- بسيطة ؟ ان شا الله
قررت اني دور على شغل بشهادتي مشان عبي وقتي .. ما بدي ضل فكر .. احيانا كان يجي على بالي بلال واتخيل لو كان جوزي قديش كنت رح ابقى مبسوطه بس ارجع قول لحالي اللهم اخزيك يا شيطان كيف عم فكر برجال تاني وانا متزوجة وكمان هو طلع خاين وتركني بعد كل هالوعود .. بلال ما بيستاهل حبي 😯
..
وبما اني دارسه تربيه رياضيات .. قدمت لاكتر من مدرسه خاصه وكنت استنى يبعتولي مشان المقابله او انه يقبلوا طلبي 😯
راضي ما عارض فكرة شغلي بالعكس قلي منيح مشان تعبي وقتك وتبطلي نق 😐
بهالحياه الفاضيه اجتني فكرة انه ارجع اعمل فيس جديد وضيع وقتي بالنت بدل ما انا هيك .. عملت حساب باسمي حلا رمزي ..وحطيت صورة كنت حبها كتير .. قلب كبير وجنبه حمامه وبنت ماسكه الحمامه بايدها باتجاه القلب ..
شاركت باكتر من صفحة .. وضيعت شويه وقت بالتصفح .. اجتني طلبات صداقه من كتير ناس ومن ضمنهم شباب وكنت ارفض الكل .. بعد شيء يومين فتحت الفيس الصبح بعد ما طلع راضي .. لقيت رساله عم تستناني :
- حلا اشتقتلك 💜
اطلعت عالمرسل .. هاد بلال .. صار قلبي يرجف بلال شو بده مني وليش بيبعتلي هيك 😩
الجزء الرابع
ما بعرف كيف حسيت وقت شفت الرساله ..خفت كتير وفرحت كتير وزعلت كتير .. احساس غريب .. معقول اشتقلي .. بس ليش بيبعتلي هيك شو بده مني 😯 ما رح رد عليه انا مو خاينه .. انا مرة متزوجه وما بعملها .. سكرت الفيس وضليت طول نهار فكر بهالكلمتين .. قد ما حاولت ما فكر ما زبط معي ..حلا اشتقتلك .. ياللللله ..
تاني يوم رجعت فتحت الفيس مرة تانيه .. كان جواتي شعورين متناقضات .. كنت حابه يكون باعتلي شيء تاني لاني عنجد اشتقتله وبنفس الوقت ما بدي يكون باعت شيء لانه حرام وغلط..
فتحت الرسائل لقيتو باعتلي :
"حلا انا بعرف انك شفتي رسالتي وانا متاكد انك انت حلا حبيبتي .. انا بعرفك من الصورة .. لانك بتحبيها .. حلا حاسس حالي كتير مشتقلك .. خلينا نحكي شوي .. ما رح اخد من وقتك 😦 وما رح اعملك مشاكل "
هالرساله كتير خوفتني .. طيب بلال ليش بده يحكي معي .. مو هو تركني بارادته .. هلء صار مشتقلي وبده يشوفني .. ما رح رد عليه وخلص رح عطل الفيس .. لسه عم فكر بعتلي رساله جديدة
-حلا ردي علي بقا .. انا بلال .. شو خلص نسيتي كل شيء .. انا تعبت
ما بعرف كيف انسيت حالي واستفزيت من كلامه وبلشت اكتبله
- انا اللي نسيت وبعت كل شيء ولا انت ، ابعد عن طريقي واتركني بحالي .. انا بحبه لزوجي كتير
- حلا اخيرا رديتي ؟؟ 😀 الحمد لله .. بس واضح من عيونك انك بتحبيه لزوجك .. حلا انا بعرفك منيح .. وقت شفتك معه حسيت اديشك مغصوبه عليه
-لا مو مغصوبه ابدا .. زوجي دكتور وقد حاله ومعيشني احسن عيشه
- بتحبيه ؟
- انت شو بدك مني ؟ ليش رجعت ؟ مو خلص تزوجت ومبسوط بحياتك
- انت بتعرفي اني تزوجت مشان هدف انساني وانا كنت كتير مضغوط هديك الفترة ومو مسؤول عن قراراتي 😣
-يا سلام .. وشو بدك مني هلء ؟
- بدي نتواصل مع بعض .. انا لسه بحبك
- نتواصل قلتلي ؟؟!! فشرت يا سيد بلال .. انا مو ممكن خون زوجي حتى لو كان سيء معي لاني ما تربيت هيك
- خيانه شو ؟ ليش عم تسميها هيك .. اعتبريني صديق وبدي اطمن على اخبارك
- بلال كرمال الله وكرمال كل شيء حلو كان بينا انتبه لمرتك وبيتك واتركني انا ببيتي
- انا مو ممكن تقل عليك .. خلص متل ما بدك .. انا اسف كتير سامحيني
....
سكرت الفيس وصرت ابكي متل المجنونه ..انا كتير مشتاقه لبلال وما صدقت انه حكي معي .. بس ما بقدر كمل .. ديني واخلاقي بتمنعني ..
حاولت انه قرب من راضي اكتر مشان عوض النقص اللي عندي .. انا هلء ضعيفة وحاسه حالي بمعركه ما بين قلبي وعقلي .. يارب قويني وسخرلي زوجي .. انا ما بدي اغلط ..
كل يوم كنت استنى راضي وحولتله البيت جنه مشان ينتبهلي بس هو ما كان هون .. ما عاطيني اي اهتمام ..
كنت عم احترق وما حد حاسس فيني ... صارلي سنه متزوجة وما عم يصير حمل .. راضي اخدني على دكتور مشان هالموضوع ووقتها كانت المفاجاة
الجزء الاخير
الدكتور خبرنا انه انا عندي تكيسات وبدي علاج طويل شوي مشان يصير حمل 😯 هالخبر كان صاعقة جديدة بالنسبه الي ..راضي ادايق كتير بس قلي انه ان شا الله كل شيء بينحل مع العلاج ..
رجعت عالبيت كتير مكتئبه وكرهانه الدنيا .. راضي تركني وراح على عيادته .. حتى بهيك يوم وهو شايفني كتير مهمومه ما حاول يضل جنبي او يخفف عني .. ما بعرف ليش حسيت حالي كتيررر مشتاقه لبلال .. بس استغفرت ربي و دفنت راسي تحت الحرام وبلشت ابكي 😢😢
فتحت الفيس بدي غير جو لقيت رساله من بلال .. باعتلي صورة ابن اخوه وكاتبلي تحتها : عمر الصغير ، شوفي اديش حباب ..
ياربي هو انا ناقصني.. هلء وقتها يبعتلي الصورة .. ما رديت .. سكرت الفيس و رجعت ابكي .. بلال مصر انه يتواصل معي وانا مصرة كون قويه لاني لو خنت هلء ما رح سامح حالي طول العمر .. بس ياريتك جنبي يا راضي مشان تقويني.. مرت الايام وكنت عم باخد العلاجات .. بلش راضي واهله يدققوا علي كتير بموضوع الاولاد .. وانه ليش العلاج ما عم يجيب نتيجه .. راضي بالاضافه لانه مو مهتم فيني كمان من جديد صار يعصب علي وما عاد طايقني
- راضي ليش هيك عم تعاملني ؟
- وكيف عم عاملك ؟
- كتير قاسي علي .. والله موضوع الاولاد مو بايدي 😢
- حلا انا ما قلت الحق عليك بس انا مدايق انه ما عم تستجيبي للعلاج .. هلء صارلك 6"شهور وما في تحسن
-طيب غير الدكتور يمكن اتحسن او يلاقولي حل تاني
..
بصراحة انا كان نفسي احمل مو بس مشان يرتاح راضي ولا مشان حس بشعور الامومة .. بس كان بدي ولد يربطني براضي اكتر لحتى ما اضعف وفكر اغلط ..بدي شي يقويني .. انا كتير عم بضعف هالفترة .. حاسه حالي بحرب والرصاص عم يخلص من سلاحي وصبري عم ينفذ .. بهالفترة ما كنت اتواصل ابدا مع بلال ولا كنت افتح الفيس حتى ما يكون باعت شيء واقراه ..😯
مر كمان سنه على زواجي ورحت على كتير دكاترة بس ما في نتيجه .. التكيسات عم تزيد ووضع الرحم عندي ما بيسمح لحمل ابدا ..
الكل كان عم ينق على راس بلال انه صار عمرك 30 وما عندك ولد 😯 وهو كان عم يحملني جميله انه صابر علي مع انه قادر يجيب اولاد ..
وبيوم فتح معي موضوع دمرني ""
- حلا انا مفكر اتزوج .. انت بتعرفي العمر عم يجري وانا نفسي بولد
- طيب انا شو ذنبي هاي ارادة الله
- وانا ما حظلمك حتجوز وانت بتضلي ببيتك
- مستحيل ما بقدر عيش هيك ..انا لحالي متجوزتك وما عم شوفك وهلء بدك تجبلي ضرة
- انا اخدت قراري وانت حرة يا بتكملي معي يا بتتركيني ما رح اضغط عليك ..
كلام راضي كان جارح كتير .. ياربي انا شو ذنبي بقصه الاولاد.. انا ما غلطت .. انا كنت قايدتله اصابعي العشرة شمع بس ما ثمر فيه ..
ضبيت اغراضي ورجعت على اهلي .. حكيت لامي كل شييء
- يا بنتي لاتخربي بيتك بايدك
- امي بترجاكي خلص انا عندي كرامه .. لو اني غلطت بحقه كنت قلت ماشي بس بده يتزوج علي مشان موضوع بايد الله ما رح اقبل 😢😯
طلبت الطلاق من راضي وهو ما كذب خبر .. بعد كم يوم بعتلي ورقتي .. ما بعرف ليش حسيت وقتها اني حرة مبسوطه وطايرة ..
امي كانت زعلانه كتير بس انا راضيتها وفهمتها وضعي .. ومشان الصدفه تكمل كلمتني وحدة من المدارس اللي قدمت فيها طلب .. عملت مقابله .. و قبلوني وبعد كم يوم استلمت الشغل .. صحيح الراتب مو كتير بس كان يكفيني انا وامي ...
كان يجي عبالي كل فترة افتح الفيس بس للاسف ما لاقي شيء من بلال .. كانه خلص يأس وما عاد بده اياني .. كان نفسي قله اني اتطلقت بس خفت يشمت فيني .. بس بلال مو هيك يااارب دخيلك .. يارب انت بتعرف انه سبب طلاقي مو حبي لبلال بس كرامتي ما سمحتلي كمل حياتي بدون روح مع واحد مسجله على اسمه زوجه وخلص .. ما كان في شيء يربطني فيه ابدا ..
صرت صادف بلال احيانا وانا طالعة من بيت اهلي لانه هو سكان منطقتنا بس بعيد شوي .. وشكله سال بالمنطقة وعرف انه اطلقت .. وبيوم كان ماشي وعمر الصغير ابن اخوه معه.. يالله ما اجمل هالطفل .. الله يحميه يارب ويخليله بلال يلي عم يعوضه عن حنان ابوه .. الولد باين عمره سنتين ونص تقريبا بس متل القمر .. كنت حاسه بخطوات بلال عم يلحقني ولما دخلت المدرسه دخل وراي .. وقف قدامي ومنعني امشي ..
- حلا بدنا نحكي كلمتين 😯
- شو جنيت بلال بعد من طريقي هاد مكان عمل مو شيء تاني
- خلص معناتها رح استناكي وقت تروحي عندي كلام كتير..
-طيب خلص يلا روح بلا فضايح هون 😣
خلص لازم شوفه بدي اعرف شو بده وانهي هالقصه .. اخر الدوام طلعت لقيته واقف عم يستناني عالباب .. طلعنا كل واحد بطريق والتقينا بكافي شوب بعيد شوي .. انا هلء مطلقة وهو متزوج ما بدي الناس يحكوا علينا .. قعدنا وبلشنا نحكي
- حلا انا لسه بحبك وانا ما تزوجت الا مشان الولد وانت بتعرفي
-طيب شو بدك مني ؟
- انا بعرف انك اطلقتي 😯
- ايه اطلقت بس طبعا مو مشانك
- لكان مشان مين ؟؟
- اطلقت لاني ما بجيب ولاد
- وانا ما بدي اولاد .. بدي اياك الك ..بالاول خفت اظلمك واتجوزك على ضرة .. بس هلء خلص بدنا نرضى بالامر الواقع ونرتبط بقا
- ومرتك ؟؟
- مرتي هلء حامل بالشهر التاسع وعلى وجه ولادة ما فيني اتخلى عنها او طلقها
- وانا اصلا مستحيل اطلب منك تطلقها .. ما ممكن ابني سعادتي على تعاسه حدا ..
- طيب بتجوزك وبتكونو تنتين شو المشكله ؟
- المشكله انا ما فيني عيش مع شريك والمشكله التانيه شو ذنبها مرتك ؟؟
- يعني انت خلص ما عدتي بتحبيني ؟
- الله اللي بيعلم😯 ... عن اذنك ..
تركته لبلال ومشيت .. صار يركض وراي ويناديلي وانا ما رد ..
بعد عني يا بلال .. لو كل مرة رفضت انها تبني سعادتها على تعاسه مرة متلها ما كان عنا الاف الضحايا من النساء... بعد عني وارجع لمرتك ولاولادك ..
رجعت عالبيت وضليت ابكي و دعيت ربنا يعوضني خير ..
بعد يومين كلمني بلال عالفيس و لاقيته كاتبلي انه هو هلء مع مرته بالمشفى وانه وضعها صعب ودخلوها عالعمليات ..
كتير شفقت عليها ودعيت الله يشفيها هي ومولودها .. دقيت لبلال وقتها وقلت خليني وقف معه وسالته عن مرته قلي :
-ولدت وجابت حلا
- حلا ؟؟ طيب الحمد لله انها قامت بالسلامه
- بس هي ماتت 😢
-شو ؟؟؟؟؟؟
- ماتت وتركتلي بنتها وتركتلي عمر شفتي الدنيا يا حلا 😢😢😯
- طول بالك طول بالك
- عمر صفي لا ام ولا اب
- بلال مشاني اهدا الله يرحمها يارب
...
زعلت كتير على ام عمر وعلى عمر .. الله يصبرك يا ابني .. مرت ايام صعبه على بلال وكنت عم حاكيه كل الوقت ووقفت جنبه ..
بعد الاربعين ..دق باب بيتي ..كان بلال حامل حلا الصغيرة بايد و كامش عمر بايده التاني
اطلع فيني وقلي :
حلا ممكن نربيهم سوا ؟؟😢😯
الدمعة نزلت من عيوني وفتت لجوا وصرت ابكي😢 .. يالله شو هالدنيا .. يعني ربنا اخد ام عمر مشان انا اتزوج بلال .. يالله شو هالاقدار .. ياربي دخيلك كيف عم توزع الارزاق .. ما كنت بحلم ابدا انه نرجع نلتم انا وبلال ببيت واحد ..
قبلت اتزوجه هالمرة مو بس مشانه كمان مشان نربي هالايتام سوا ..
تزوجنا وانا كتير مبسوطه هلء بس لسه عندي حلم انه الله يعطيني طفل ينورلي حياتي ويكون اخ لولادي عمر وحلا ..
الحياة دوارة ما تياس ابدا لانه الله كبير
انتهت

شاركه

عن غير معرف

هذا النص هو مثال لنص يمكن ان يستبدل في نفس المساحة ايضا يمكنك زيارة مدونة مدون محترف لمزيد من تحميل قوالب بلوجر.