العانس ..

العانس ..
بقلم الكاتبة هنادي العماوي


الجزء الاول
بفضل الله اليوم حصلت على هاللقب .. "العانس" هيك صارو ينادوني .. اليوم صار عمري 31 وحسب كلام امي واخواتي ..راح القطار وتركني واللي قد اولادي تزوجوا 😯 .. نطيت حدود التلاتين .. هالحاجز المنيع اللي كان بيفصلني عن هاللقب .. خلصت العشرينات يلي كان فيها شوية امل انه اتزوج .. ودخلت حياة التلاتينات يلي لازم انسى فيها كل شي عن الزواج لانه شي مستحيل حدوثه 😯
من جواتي كنت كتيرر مكسورة وبتالم ..مو لاني رح موت و اتزوج بس لاني رح موت وما حد يقلي انت " عانس "😢..
اسمي لمياء .. اسمرانية شوي وطولي منيح وعيوني بنية واسعة ..شكلي كتير مقبول وانا ما بشوف خالي بشعة .. قبل كم سنه اجاني كم عريس بس اغلبهن ما كانوا يرجعوا.. واللي كان يرجع ما كان الله يكتب نصيب .. بعمري ما تكبرت على عريس وكنت مقدمة كتير تنازلات بس هالشيء ما شفعلي وما خلى هالامر يتم 😕
بسكن ببيت اهلي مع امي واخي محمد خاطب وعرسه بعد كم شهر .. كان عندي اختين بنات اصغر مني بس الله سهلهن واتزوجو وما صفي الا انا ..
درست بالجامعة علوم عامة بس الله ما وفقني وما توظفت ومن وقتها وانا قاعدة بالبيت😯
امي يلي المفروض تكون احن وحدة علي بالدنيا .. كانت عم تحسسني طول الوقت اني غلطة عمرها واني عالة عليهم ويااااريت يجي اليوم اللي انستر فيه لانه بحسب قواعد مجتمعنا الشرقي العظيم .. طول ما انت مو متزوجة اذن لسه ما انسترتي وباي وقت ممكن تجيبي العار لاهلك 😯 .. ويا ويلي وقت وحدة من قرايبنا تتزوج .. كانت امي تقلبها عزا بالبيت وكانه حد مخبرها انو حدا من اولادها مات
كل هالشيء خلاني اخد قرارت غلط كبيرة بحياتي
😢
الجزء الثاني
كنت حاسة حالي طول الوقت عم واجه مجتمع كامل بكل تقاليده وعاداته وخرافاته😯 الكل ضدي حتى اقرب الناس الي ..وين ما روح هاي تزوجت وهاي خلفت وهاي سافرت وانا مكانك قف ما في تغيير بحياتي .. للحظات كنت وقف مكسورة مو قدرانه واجه ..ولحظات تانيه حس حالي قويه لاني لليوم محافظة على حالي وعلى اخلاقي وما بفكر ابدا اعمل شيء غلط .. كنت بين قدام الكل قوية ومو فارقة مغي واتحمل كل التعليقات الجارحة على ليش ما تزوجتي لهلء .. والله شكلك منيح .. ليش الناس مو شاييفنك .. اصبري كله باجره 😯
كان نفسي وقف وصرخ بوجه كل هالعالم وقلهم : اتركوني بحالي ما بدي مواساتكم ولا سؤالكم ولا حتى اهتمامكم .. انتو انسوني وكتر خيركم ..
قرب عرس اخي محمد والكل كان عم يجهز وانا كمان .. حسب كلام امي هاي فرصتي الوحيدة انه حد يشوفني ويخطبني ..طبعا هالحدا مو ممكم ابدا يكون اعزب .. احنا قبلانين مطلق او ارمل او متزوج وعنده اولاد .. معلش المهم رجال .. ذكر انكتب على اسمه وانتقل من قائمة العوانس لقائمة المتزوجات اللي الله راضي عنهم .. بهديك الفترة كنت كتيررر ضعيفة وفعلا كنت بدي عريس والسلام 😯😕
كان اهتمام امي فيني غير عن الكل .. عملتلي جلسات للبشرة والشعر ووصتلي على فستان بمبلغ وقدره .. على قولتها بدنا نخلص بقا 😑
اجا العرس وكنت طالعة حلوة الحمد لله او عالاقل ما بتعيب .. العروس مرة اخي كانت عادية مو هالجمال الخارق بس سبحانك يارب اخي قاتل حاله عليها ونفسه يشيلها عن الارض ويحطها بقلبه .. سبحان الله كل شيء نصيب .. هالشيء ما كان مدايقني بالعكس الله يهنيهم ..
كنت اسمع بعض التعليقات من النسوان بالحفله انه ما شا الله عليك وان شا الله بيجي نصيبك وهيك ..
اتزوج اخي واجت مرته شرفت عنا عالبيت .. وياربي شو طلعت قوية ومخباية بتيابها .. ما بدها تشارك ابدا بشغل البيت و لا بدها توقف تعليقات بايخة .. انا وصلت لمرحلة ما قدرت اتحملها
-لمياء اعمليلي قهوة بالله
-وليش ما تقومي تعملي ما شايفتيني عم اجلي
-هلء انت واقفة وواقفة خلصينا بقا ..
- معلش مو فاضيه
-فعلا اللي استحوا ماتوا .. اعملي بلقمتك عالاقل
هالكلمة وقعت على راسي متل الصاروخ .. جمدت بارضي وما قدرت ما اتخانق معها ... اجت امي واخي عاصواتنا وبلشت الخرباية تشكي
-بدها تضربني يا محمد 😢😯 انا قلتلك من اول يوم انه بتغار مني .. عم تحنلني ذنب انه ما تزوجت
-شو هالحكي ؟ وقحة انت
- شفتو شو عم تحكي .. انا تعبت من غيرتها ..انا شو ذنبي 😯😯😢
صار الكل يراضي فيها ونسيوني ونسيو دموعي و اهاتي ... ركضت لغرفتي وصرت ابكي
كل هالشيء خلاني وافق على اصعب قرار بحياتي وفوت على سجني بايدي و رجلي
الجزء التالت
بلشت المشاكل تزيد بيني وبين مرة اخي الشرنه يلي كانت طول الوقت عم تحسسني بالنقص وانه انا عالة البيت وياريت يخلصوا مني😢 .. استمر هالشيء قرابه الشهرين .. بلشت امي تحس انه كل تخطيطاتها وترتيباتها للعرس مشان اتزوج راحت سدى 😯 يا خسارة المصاريف والمكياج .. وبعد ما فقدت الامل تقريبا اجا العربس المنتظر .. اتصلو الجماعة وقال جايين يشوفوني 😃 الكل فرح كتير وانا اولهم .. بالليل اجو الخطابين كانوا عبارة عن تنتين نسوان اخوات العريس شافوني وتفحصوني منيح منيح وبعدين اشروا لبعض انه منيحة ..انا ضيفتهم القهوة ورحت وما سمعت شيء عن مواصفات العريس ..كنت رح طير من الفرحة زمااان عن هالشعور .. هاد الاحساس انه الناس شايفتك حلو او انك مرغوب كنت مفتقدته من زمان .. راحوا الجماعة واجت امي لعندي 😐
- مبروك حبيبتي مبروك يا لميا ..انت عجبتي الجماعة وهنن موافقين عليك
-بس لسه العريس ما شافني ولا انا شفته 😯
-خلص هنن قالو بتعجبيه وعارفين طلبه
-طيب وانا ؟
-شو انت كمان بدك تتشرطي 😡؟؟!
حسستني امي انه مو من حقي ابدي رايي لانه كتر خيرهم اللي قبلو فيني .. حسيت حالي مالي وجود وقراري مو مهم ابدا ..
عرفت بعدين انه العريس عمره 52سنة .. صارله 18 سنة متزوج والله ما طعمه اولاد .. ابو الامير هيك بينادوله .. ورح يتزوجني مشان جبله هالامير .. وضعه المادي مرتاح و رح اسكن ببيت مستقل.. طبعا اي بنت طبيعيه كان لازم ترفض هالصفقة اللي ما بتحترم انسانيتها 😯 بس انا ما الي حق الاختيار لاني "عانس" ..
اخي وامي واختي كانوا موافقين .. بس اختي الصغيرة ما نصحتني بهالجوازة وانه الضرة مرة ورح اتعب معها .. وكمان فرق السن كتير كبير وما حيكون تفاهم 😯
كان نفسي قلها مو مهم التفاهم ولا مهم المشاكل ولا مرته ولا ليش بده يتزوجني .. المهم انا صير ست " متزوجة " هاللقب يلي طالما حلمت فيه 😯
وافقت على زواجي من ابو الامير .. هو كان شخص طويل وسمين وابيض وما عنده شعر ابدا .. شكله ما كان مهم بالنسبة الي لانه مو هدفي حبه ولا اتقبله .. هو مجرد وسيله رح توصلني لهدفي 😕 وما حسبت لشيء ابدا .. اخيرا نزلت عسوق الدهب ..هالمكان يلي طالما تمنيت ادخله 😀و نزلت على محلات فساتين السهرة مشان اختار الفستان الابيض .. ياللله شو حلو هالشعور .. كان كل شيء تماام و اشتريت كل شيء بتمناه ... خبرت الكل انه خلص رح اتزوج و رح انهي لقب عانس يلي لزقتوه فيني .. ابو الامير ما كان يعطيني اهتمام كبير وكانه مجبر على هالشيء او انه متخذني وسيله ليجيب الولد .. خلال فترة الخطبة يلي استمرت شهرين .. ما شفت ضرتي ابدا وما لمحتها وما عرفت طباعها 😯
تم العرس وفتت على هالحياة الجديدة يلي ما بعرف شو رح تعمل فيني 😦
الجزء الرابع
دخلت بيتي .. مملكتي الخاصة وحلم حياتي ..قعدت مع ابو الامير
-اسمعي يا بنت الناس .. انا رح عاملم بما يرضي الله وانت مرتي على سنه الله ورسوله بس بدي تعرفي شغله انا مرتي غادة بحبها وقيمتها على راسي وبدي اياك تعامليها احسن معامله
- اكيد ولا يهمك
من اول ليله عم يوصيني على مرته ..يعني كانه عم يقلي انه انتي ولا شي مجرد " رحم " اتاجروا ليجيبله الولد 😯 يالله هالدنيا شو قاسيه .. هلء كان انا مجبورة اقبل هيك واحد بس لسبب وحيد هو انه اخرب من كلام الناس .. لهالدرجه صار كلام الناس يرسم حياتنا ويلونها بالالوان المعتمة يلي بيفرضها علينا ..
اللي صار بيني وبين ابو الامير هديك الليله كان شيء مقزز ما في شي من الانسانية ولا الحب .. اتنين عم يعملو شغله مغصوبين عليها لتمشي حياتهم 😢😯 شيء خالي من اي مشاعر الرغبه او الشوق .. هالشيء هدني وتعب نفسيتي و دمرني ..حسيت حالي دمية ولازم اقبل بيلي عم يصير ..
تاني يوم الصبح .. صحيت من النوم ما لقيت الرجال جنبي .. دورت عليه بالبيت ما لقيته ..حضرت فطور ودقيتله ..قالي انه هو عند غادة ورح يفطر معها .. شو هاد من اول يوم .. حسيت شعورين متناقضين من جهة انا اتعس وحدة بالعالم متل اي وحدة تركها زوجها بيوم صباحيتها وراح لعند مرته القديمة ومن جهة انا سعيدة انه هو مو موجود لاني اصلا مو طايقة قربه مني .. مو لشكله او لعمره لا سمخ الله .. بس لنشافته وخلوه من المشاعر 😯
بعد العصر رجع عالبيت .. وطبعا كانت امي واهلي اجو باركولي وراحوا .. راجعته بيلي عمله ..قالي كلمة متل الرصاصة فاتت بقلبي
-شو بدك تقارني حالك بغادة 😑؟ انا من امبارح فهمتك انه هي شيء وانت شيء تاني
كلامه تعبني كتبر ..مفروض متل اي شخص يكون مبسوط عالعروس الجديدة .. مفروض يكون سعيد بانه عم يجرب شيء جديد بس عبث ..الحب اللي بقلبه لمرته اقوى من انوثتي واغراءاتي ..
فكرت انه جرب حاول معه وانه اجذبه ناحي .. بس رجعت قلت لحالي .. على شو .. لا انا بحبه ولا هو كمان .. خليه بعالمه وانا بعالمي 😕
طلب مني انه البس وروح تعرف على غادة .. طبعا هالشيء ممكن يدايق اي مرة بس انا قررت اني كون لا مباليه واجي على حالي .. كمان كان عندي فضول انه شوف هالغادة..
لبست احلى شيء عندي وحاولت ابرز كل شي جمال انا بملكه ..وتمكيجت على اخر طراز ..
وصلنا بيت غادة ..فتحتلنا الباب وقال تفضلوا .. ما بعرف كيف ممكن اوصفها الكم ولا كيف ممكن اوصف شعوري وقت شفتها وشفت بيتها .. بس بقدر قول شغلة وحدة هي " انثى " بكل شي في معاني بهالكلمة ..ست حنطية وعندهت غمازات بيشلوا ..طولها وسط وشعرها لاخر ضهرها ..لابسه تيير كتير اكابر وسمبل .. بيتها عم يفوح فل وياسمين ..قعدت معها .. ما حسيتها غيرانه مني ابدا .. بل بالعكس انا اللي كنت عم طق من غيرتي 😯 .. كان كلامها موزون وبمحله .. بتبتسم طول الوقت وبترحب .. مشيتها بحساب وحركاتها بحساب وكلامها بمية حساب ..
بعد ما رجعت على بيتي .. قررت انه اضرب ستوب ووقف .. ما رح موت حالي ولا رح غار من هالملاك المتحرك .. حسيت حالي للحظة حقيرة انه انا كسرت قلب هالمخلوقة واخدت جوزها .. بس المشكله صارلي 30 سنه عم ينكسر قلبي وما حدا حاسس فيني ..
قررت احترم مشاعر زوجي وحب لمرته وبنفس الوقت كون الزوجه الصالحة اللي بترضيه .. ما بخفي عليكم كل هالقرارات كانت نابعة من قلب ما عرف الحب ..انا لو بيوم حبيته لابو الامير ما كان سمحت لوحدة تشاركني فيه 😯
كملت حياتي طبيعي معه .. الشيء المنيح انو كان ما يبخل علي بالمصروف وانه شو بدي بيحضر 😐 بس المشكله انه قلبي صار ميت ..عنجد ميت .. لا احساس ولا حب ولا مشاعر ..هو من جيل وانا من جيل تاني مختلف ..في شغلات بيكون نفسي فيها ..نهفات نفسي اعملها ..بس بخجل اطلبها منه لانه بعمر ابي .. وصلت لمرحله فعلا صرت حسه ابي .. بما انا اصلا يتيمة ومحرومة من حنان الاب ..بس اللي انا متاكدة منه انه الاب ما ممكن يفرق بين اولاده .. بس جوزي عم يفرق كتير بيني وبين غادة😢
الجزء الخامس
الايام عم تمشي صارلي 6 شهور متزوجه ..ما عم يصير حمل 😢طيب شو المشكله يارب ..خليني جبله هالولد بركن بيحس فيني .. هو كان عم يسالني كل يوم وانا قله ما في .. قرر ياخدني على دكتور .. رحنا لعنده وقال انه ما عندي مشاكل .. شويه التهابات بتتعالج وبعدها بيصير حمل بسرعة ان شا الله ..
كان نهاري كتير طويل وفاضي ما في شي يعبيه ..جوزي طول الوقت يا بشغله يا عند ضرتي ..تعبت كتير من الفراغ ..كنت قضيها تصفخ للانترنت وقراءة روايات .. بمرة وقعت عيني على قروب نسائي بيكتبوا فيه مشاكلهم وبيتشاركو الحلول ..طبعا انا بخاف انشر شي .. بس حبيت اقرا واستفاد ..وفعلا المنشورات كلها كانت عبارو عن مشاكل ..وانه جوزها تاركها لحالها طول نهار وانه ما بيعبرها وانه حاسه حالها وحيدة ..ما بين كل هالردود على المشكله ..كان في رد لصبيه كان يمكن سبب بتغيير جذري بحياتي ..كان مكتوب هيك
" لماذا تعتقد المراة ان الرجل هو مصباح علاء الدين الذي سوف يحقق احلامها ..لماذا ترى ان الزواح سيخلصها من كل مشاكل الحياة ؟ هل الفستان الابيض هو بوابة الدخول للسعادة وبعد ذلك لن تواجهي اي مشاكل ؟ هل تعتقدي انا االرجل الشرقي في مجتمعنا هو ذاته فارس الاحلام الذي طالما قراتي عنه في الروايات .. لا يا عزيزتي الرجل هو كتله من المشاكل وغيمة من الهموم يتزوجك ليمطرك بها لا ليخفف عنك همومك ..كوني انت وفقط انت ..دللي نفسك .. اكملي حياتك . اسعدي ذاتك ..اقراي .. تثقفي ..اخرجي ..تعرفي ..لا تتقوقعي في ضلع الرجل كالعذراء تخاف الفضيحة ..انت اقوى من كل ذلك "
هالكلام اثر فيني كتير ..قراته عالاقل شي عشر مرات 😊 يعني في نساء كتير متل معاناتي .. انا فيني كون احسن ..فعلا الرجل مو مصباح علاء الدين 😯
من يومها قررت كون انسانة جديدة .. رح اطلع .. رح شوف الناس .. رح اهتم بحالي .. رح اشتري كتب واتثقف .. انا ماني جاهله.. انا انسانه كاملة بعقلي وبانوثتي وما بدي حد يكملني ..عندي طاقة ممكن تساعدني كون شيء مهم بالحياة ..
وبما انه ابو الامير ما بيبخل علي طلبت منه مصاري وصرت انزل عالصالون كل فترة واهتم بحالي ..كمان سجلت بنادي رياضي واهتميت كتير برشاقتي وبصحتي .. صرت اقرا كتب اكتر واتنور اكتر وشوف انه الدنيا مليانه .. حاولت قوي حالي بتخصصي وكون قد حالي لمناقشه مع اي حد 😀
هلء صارلي سنه متزوجة وما في حمل ..ربنل ما عم يريد .. ابو الامير كان مبسوط بالتغيير اللي عم يشوفه فيني وبلش ينجذبلي .. بس همه الكبير كان الولد يلي ما كان ييجي ..
وبيوم اجا لعندي
-لمياء بدي قلك شي وما تزعلي 😐
-تفضل
-انا اتفقت مع غادة من اول انه اتزوج مشان الحمل وهي وافقت بس اشترطت علي انه معي سنه وحدة بس ان حملت مرتي اوك وان ما حملت خلص لازم طلقها لانه بكون ربنا مو رايد😑
-ايه ؟
-صارلنا سنه وشهر متزوجين وما عم يصير شي
-والمعني ؟ بدك تطلقني
-بس ما رح اظلمك رح اعطيك مؤخرك كامل وكل شيء بتطلبيه
بعالبساطة ..بهالبساطة يا " رجل " بدك تعطيني لقب مثقفة .. بعالبساطة بدك تسحب مني اسمك ..يلي اعطاني صك الغفران بهالمجتمع المريض .. بس عالعموم شكرا لكل لحظة قضيتها مع هال " ذكر " .. انا رح احترم حبك لمرتك واخلاصك ..انا قويت كتيررر بهالسنه انا هلء وحدة تانية ور ح واجه .. يبدو رح قضي حياتي ناضل ضد هالمجتمع العظيم ..
رجعت لبيت اهلي مطلقة ..امي صارت تبكي وتندب
-اسمعي امي لو سمحتي خلص .. ما رح اسمح لحدا يهيني بعد اليوم .. انا ما حكون عاله على حدا
طليقي اعطاني مؤخري كامل .. وانا اخدته وبلشت فكر بمشروع عيش منه وما دايق حدا .. وبما اني دارسه علوم عامة .. قررت افتح مركز تعليمي لتاسيس الاطفال .. وفعلا بلشت الفكرة واخي محمد شجعني لانه كان حابب يكونلي مصدر دخل وما عيش على قفاه 😯
وفعلا عملت اللي فكرت فيه ..بلشت مشروعي ..كل الامور كانت صعبه بالاول .. وقعدت فترة لبين ما اثبتت نفسي وجبت مدرسين معي .. الفكرة تطورت والحمد لله رخصت المركز من وزارة التعليم والاقبال صار منيح .. صار عندي دخلي الخاص وصار محمد يلجالي لساعده وانا كان احب على قلبي 😍
مرة اخي ما عادت تسترجي تحكي كلمه معي ابدا لاني صرت اقوى مما بتتصوروا
صحيح انا هلء مطلقة وصحيح رح ضل ناضل طولما انا حامله هاللقب ..بس قوتي وثقتي بحالي خلتني اقدر سكت اي لسان بيحكي كلمة ..كنت حط حد لكل حدا بيفكر حاله بيفهم 😑
انا انثى اذن انا قوية .. هاد صار شعاري بالحياة
ورح كمل 😉
انتهت

شاركه

عن غير معرف

هذا النص هو مثال لنص يمكن ان يستبدل في نفس المساحة ايضا يمكنك زيارة مدونة مدون محترف لمزيد من تحميل قوالب بلوجر.