طبق الاصل..

طبق الاصل..
بقلم الكاتبة هنادي العماوي


الجزء الاول
اقبح شعور ممكن تحس فيه انه الشخص يلي انت بتحبه وبتعتبره كل حياتك ما بحبك لذاتك ولا لانك انت .. عم يحبك بس لانك معك مصاري او عندك عيلة كبيرة او ......
وصدق اللي قال " يكفي ان تكوني جميلة حتى يكون حظك قبيحا"
انا روعة ... هيك سموني اهلي لاني وقت خلقت كان جمالي فتان او غربي متل ما بيقولو .. عيوني زرق متل موج البحر وشعري اصفر متل الدهب ووجهي صافي متل شلال مي 😍😍 .. قالتلي امي انه وقت شافتني ما صدقت حالها انه انا بنتها من كتر جمالي .. صحيح خواتي التانينن شقر بس انا كنت غير .. كل العيله كانت مبسوطة بهالوافدة الجديدة .. كنت رقم 3 بين اخواتي واصغرهم .. ولاني البنت الوحيدة اخدت دلال كبير من اهلي .. و كانت امي دايما مفتخرة فيني وانا عم اكبر قدام عيونها وعم يزداد جمالي .. من لما صار عمري 15 سنه بلشت الناس تدق بابي ☺ والخطابين كتار ..بس ابي كان رافض فكرة اني اتزوج الا لحتى خلص جامعة .. كبرت وخلصت البكالوريا بمعدل ممتاز وفتت الجامعة تخصص جغرافيا وكنت كتير سعيدة بحالي وواثقة بنفسي .. ومتل ما بيقولو " الصمت في حرم الجمال جمال"
..
كانت اموري بالجامعة كتير ماشية .. وكل طلاب الجامعة نفسهم يحكو معي بس انا ما كنت اعطي وجه لحدا ويا ارض اشتدي .. مو غرور بس هيك اهلي ربوني 😊 صارلي سنتين بالجامعة .. اتعرفت على صديقات كتير بس كانت اقرب وحدة الي بنت لطيفة كتير اسمها ندى
- والله يا روعة ما بحب امشي جنبك .. يعني انا حلوة لحالي بس وقت صف جنبك بحس حالي صفر عالشمال 😂
-ايه لا ندى ..انت ما في منك 😉
-شوفي كل شباب الجامعة ناطرين منك نظرة وانت ولا هون
-شو انسة ندى بلشنا غيرة 😉
-لا والله مو غيرة بس حسد 😂
-العمى بعيونك انصبي بقا ☺
فتنا عالمحاضرة .. عم ننطر الدكتور .. وبعد شي عشر دقايق اجا تبليغ انه دكتور المادة اتعرض لوعكة صحية ومو جاي اليوم.. يلا خير ما عمل 😂
المرة اللي بعدها انتظرنا 5 دقايق للمحاضرة .. وبعدها فات شاب لابس بدله رسمي اسمراني بعيون واسعة وسع البحر و عضلات مفتولين متل عارضين الازياء 😮
-مرحبا انا استاذ نادر .. حاصل على ماجستير بعلم الخرائط ورح كمل معكن هالمادة لانه دكتور عبد الحق محتاج فترة راحة وان شا الله ننبسط سوا ونستفيد من بعض
طبعا كل بنات القاعة فتحوا تمهن عالاخير وصفنوا بهالاستاذ .. بصراحة جماله كان عادي بس وقفته واكابريته وطريقة كلامه بتخليه اوسم رجل بالعالم 😑
معقول انا اعجب بشاب هيك من اول نظرة .. رفعت ايدي اسال سؤال وكان بغرضي انه يشوفني او حتى يلمحني .. ما بعرف ليش صار قلبي يدق .. قلي تفضلي .. انتبهت لعيونه انها ما حتفارق وجهي .. سالت سؤالي وقعدت بس طول فترة المحاضرة ما شال عيونه عني 😙
كتير بنات لاحظه وخصوصي الدبة ندى
-لك يخرب بيتك حتى الاستاذ طبس فيك .. شو غاملة للرجال انت
-ندى عيب شبك ؟😜
-كان منيح وما بيطلع بس وقت شافك مدري شو صارلو ☺
فرحت كتير بكلام ندى .. معناتها كان عم يطلع فيني عنجد .. ياربي اول مرة افرح انه شاب مهتم فيني .. بس شو سر هالاهتمام من اول نظرة ..معقول سري باتع متل ما بتقول ندى 😂
اتكررت المحاضرات و زادت النظرات .. اخر شي كان الكل رح يشتلق عليه بس هو حاول يتدارك الموقف ووقف نظراته 😉
اطلعت من المحاضرة وقلبي عم يرقص .. تفاجأت انه جنبي
-انسة ....
-روعة ..اسمي روعة
-ياريت تشرفيني عالمكتب وقت تحبي 😊 في شي مهم...
الجزء الثاني
اتلبكت كتيررر لما سمعت انه بده يشوفني .. خبرته وانا كتير خجلانه انه رح اجي بعد المحاضرات يعني ع 12 قلي اهلا وسهلا ورح يكون بالمكتب 😀
صار وجهي احمر كتيرر من الخجل وهالشي اعطاني جمال كبير والحمد لله
-ندى لازم تروحي معي .. بخجل لحالي 😯
-ولي روعة هو بدو يشوفك الك حلي عني 😊
-بس انا بخجل لحالي .. زكاتك ندوش امانة روحي معي
-طيب امري لله 😕 مو مشانك بس عندي فضول اعرف شو بده 😂
رحنا بالموعد انا وندى .. قلبي كان عم يدق كتير وخجلي ما بينوصف .. يا ترى شو بده 😮
وصلت لعنده ودقينا الباب .. ابتسم وقت شافني ابتسامه عريضة بس تراجعت هالابتسامة وقت شاف ندى معي 😑
- تفضلو اهلا وسهلا
-اهلا بيك..
حسيت انه مو عرفان يحكي لانه ندى معي .. وملبك كتير .. ضيفنا وسال عن دراستنا و خلص .. ما قال شي مهم .. اعطاني كرته وطلب مني حاكيه 😒
طلعنا من عنده وما فهمت شي ..
-قلتلك ما بدي روح معك .. شفتي كيف كنت انا شخص غير مرغوب فيه
-شلشني يا ندى بدي اعرف شو بده 😕
صار عندي فضول كبير .. روحت عالبيت مبين القلق على وجهي .. امي كانت رفيقتي وبحكيلها كل شي .. خبرتها بلي صار وانه الاستاذ كتير محترم بس ما فهمت شو بده .. امي قالتلي انه انت عقلك كبير وبتفهمي وانا واثقة فيك .. اعرفي شو بده وفهميني وانا قلبي حاسسني انه خير ☺
دقيت عالرقم يلي اعطاني اياه .. رد علي وانبسط باتصالي .. حكالي انه الموضوع يلي بده يفتحه معي ماله علاقة بالدراسه وما بنفع نحكي فيه بالحرم الجامعي .. طلب انه يشوفني بكافتيريا .. ولانه الشي مهم قبلت وخبرته اني موافقة 😊
وبالموعد المحدد لبست فستان كتير حلو لونه زهر بارد وطلعت متل الاميرة ..كان عم يستناني بالمكان .. ابتسمت .. سلمت علبه وقعدت
-اهلين وسهلين نورتي انسه روعة ..
-شكرا استاذ
-ما بعرف كيف بدي بلش حكي بس رح عرفك على حالي
-تفضل
-طبعا بتعرفي اسمي نادر .. عمري 29 سنه .. ساكن هلا بالشام .. سافرت بعد البكالوريا على المانيا ودرست جغرافيا عمرانية وبعدها عملت ماستر بعلم الخرائط والحمد لله الله وفقني وعلء رجعت لبلدي ومعلومك الحجة جننتني وعم تدورلي عروس قال انا قربت ع 30 ورح عنس 😁
-تشرفنا فيك .. اي ؟
-بصراحة انت عجبتيني كتير .. حاسس حالي لسه باوروبا وقت شفتك 😉
-شو قصدك ؟
-ممكن اتقدملك ؟ 😊
-بهالسرعة لسه ما بتعرف عني شي ؟!!!
-لا انا سالت عنك وبعرف كل شي .. عيلتك ناس اكابر ومحترمين وبيشرفني نسبكم
-يعني هلء شكلي يلي خلاك تعجب فيني بهالسرعة وتقرر ترتبط فيني
- لا طبعا مو بس الشكل .. كلامك حلو وروحك مرحة واخلاقك عالية شو بدي اكتر من هيك 😉
انبسطت كتير بكلام نادر .. طلبت منه وقت لفكر واحكي لماما .. كنت كتير متفاجأة .. ما صارلي بعرفه الا شهر .. بس بصراحة كنت كتير مبسوطة بكلامه وحسيت اني معجبة فيه عنجد وبلشت حبه .. معقول يصير فيني متل الافلام واتزوج استاذي 😁 رجعت عالبيت وخبرت ماما بكل شي .. حكتلي اذا منيح ومحترم الله يقدم اللي فيه الخير ..
تقدملي نادر .. اهله ناس مناح .. وما حد ذم فيهم .. بابا وافق بشرط انه كفي دراستي هالسنه مخطوبه والسنه اللي بتبقى بكملها وانا متزوجة ..
خطبنا انا ونادر .. كان كتير لطيف معي .. دايما يتغزل بجمالي وبلون شعري وبعيوني .. كان يجبلي اواعي كتير بس استغرب انه كلن نفس الستايل واغلبن شورتات قصيرة .. سالته عن السبب قلي انه كتير بيلبقولي 😯.. حسيت انه عم يحصرني بلبس معين وقصة شعر معينه والوان معينه .. ما كنت حابه هالشي بس هو قلي انه انا احلى هيك متل اميرات ديزني ..
مرت الخطبة وانا بقمة السعادة .. وعدت باقي السنه على خير .. نجحت الحمد لله
قررنا موعد العرس وكان كل شي تمام .. واجا يوم العرس وكنت اميرة وهو جنبي احلى فارس احلام ..
تزوجنا وكل شي تمام .. وبيوم الصباحية
-روعة بدي احكيلك شغله وما تزعلي
-ايه حبيبي ما بزعل منك
-انا كنت مفكرك انحف من هيك .. تفاجات انك مليانه شوي بتقدري تنزلي وزنك☺
-شو ؟؟ انا مليانه كله وزني 50
-ايه بس لانه طولك رائع ممكن تكوني متل عارضات الازياء لو صار وزنك 45 مثلا
تفاجات كتير بكلامه .. هيك من اول يوم ما عجبه جسمي .. بس يمكن لانه كان باوروبا ما بحب المرة المليانه .. قررت اني نحف حالي مشان اعجبه 😕
الجزء التالت
حسيت بغصة جوات قلبي انه انا يلي طول الوقت الكل عم يمدح جمالي .. يجي جوزي من اول ليله ما اعجبه ..
علاقتي كانت ببيت حماي محدودة .. بيتي مستقل وبشوفهم كل فترة لما روح عندهم او يجو عنا .. كانو كتير محترمين معي وقمة الذوق .. وفعلا ربنا وفقني بهيك عيلة 😊
نادر بالمقابل كان طيب ومنيح معي بس لساته عم يدقق علي بلبسي ومكياجي و ضحكتي وكل شي ..كانه بده اياني مرسومة رسم .. ما كان يقب حط مكياج ابدا وكان يقلي انت حلوة بدون شيء ☺
احيانا كنت افرح بهالحكي واحيانا حس حالي مقيدة كتير ومو ماخدة راحتي بشيء ..بلشت بريجيم مشان انزل الخمسه كيلو وصير متل ما بده .. وفعلا خلال اقل من شهر نحفت وصرت عصايه طقي اكتر مو انا اصلا نحيفة .. ماما سالتني وهالمرة ما قلتلها السبب .. اعتبرت انه هاي صارت اسرار بيتي وما لازم طالعها لحدا حتى لو كان امي 😊
قضينا الاجازة طلعات وفوتات وكنا مبسوطين سوا بس كنت لاحظ على نادر انه اغلب الوقت صفنان وبيفكر .. هيك لحتى رجع الدوام ورجع نادر لشغله وانا رجعت لدراستي .. التقيت بندى وكنت كتير مبسوطة بشوفتها
- كيفك روعة ان شا الله مبسوطة بالزواج يا عمري
-ايه مبسوطة الحمد لله نادر ما فيه منه بس ....
-بس شو ؟
-ولا شي بس انا حابة غير بشكلي شوي مليت من هالقالب يلي انا فيه .. نفسي حس حالي يوم انه شعري اسود مثلا وعيوني بني او هيك شي 😯
-مجنونة انت البنات عم يصبغوا شعرن اشقر وانت بدك تعمليه اسود .. بعدين بركن جوزك ما حب الاسود
-لو بيحبني رح يضل يحبني كيف ما كنت 😕
ما بعرف كيف كنت عم حس وقتها .. نادر بيحبني فعلا بس اكتر شي بيحب شكلي و بيحسسني انه لو راح هالشكل انا بصفي ولا شي 😣 هالشعور كان كتير مزعجني و مخوفني .. قررت اعمل اختبار لمشاعره .. خلص انا رح غير شكلي .. اليوم بعد الجامعة رح انزل عالصالون واصبغ اسود ... لازم يحبني كيف ما كنت 😯
وبالفعل اخدت قراري ونزلت قصيت شعري و صبغته بني غامق ... ياللله شو تغير شكلي كاني مو انا.. وحدة تانيه تماما .. حبيت حالي كتير .. اول مرة جرب الشعر القصير الغامق .. طالعة كتير كيوت .. روحت عالبيت وكنت مستنية اسمع احلى عبارات الغزل من نادر ... جهزت حالي ولبست شي حلو وحطيت مكياج واستنيت نادر ليشوف المفاجاة 😍
بعد نص ساعة اجا نادر فتحتله الباب .. اطلع فيني منييح .. رفع حواجبه لفوق .. وعيونه قلبت كلها غضب 😡.. رمي الشنطة من ايده وقفل الباب .. وصار يصرخ متل المجنون .. كانه ركبوا مية عفريت
-شو هاد شو هاد يلي عاملتيه بحالك ؟ قولي انها باروكة .. باروكة صح
-لالا لا .. هاد شعري 😯 شو بك نادر
-شو بني والله لاقتلم واحسب الله ما خلقك .. مين سمحلك تعملي هيك بحالك ؟ كيف بتتصرفي من راسك ؟
هجم علي متل المجنون وصار يضربني .. كسرلي جسمي تكسير وكان يحكي كلام مو مفهوم ..
-خلص ما بدي اياك خلص .....
بعد ما ضربني كتير وانل كنت ابكي وصرخ وما حد سامعني .. قعد عالكنبايه متل المهدود .. وصار يبكي كانه طفل صغير .. طالع صورة من جيبته .. وصار يطلع فيها ويبكي .. ويبكي .. ويبكي
الجزء الرابع
قمت غصبن عني مع انه جسمي مكسر وفتت على اوضتي وصرت ابكي .. حاسة حالي متل المجنونة مو فاهمة شي .. حتى ما سالته عن الصورة يلي بايده 😯..
كنت سامعة صوت عياطه متل الطفل يلي فقد امه
. كان عم يرطم بالالماني وانا مو فاهمة شي وكانه عم يحاكي حدا .. بعد شي ساعة اجا لعندي
-روعة .. ليش عملتي هيك ؟ انا كنت منيح معك ؟ ليش هيك ساويتي ؟
-انا شو ساويت ؟ لسه الك عين تحكي .. لسه انت ما شفت شي مني .. عم تضربني ! عم تضربني الي ؟
قرب لعندي اكتر وفرجاني الصورة .. صبيه عمرها بمتل عمري بتشبهني كتيررر عيونها متل لون عيوني وشعرها اصفر طويل متل ما كان شعري .. لابسة نفس ستايل اللبس يلي كان يلبسني اياه .. انصدمت بهالصورة وحسيت عقلي ما عاد بمحله .. مين هاي ؟ مييين؟
-هاي ماتيلدا .. حب عمري ومرتي .. البنت يلي كانت بالنسبة الي كل الدنيا..انا ..
-مرتك
-ايه حبيتها وتجوزتها وكانت اغلي شي بالدنيا عندي
-وليش تركتها واجيت لهون ؟ ليش ما قلتلي انك كنت متزوج؟ ليييش؟😬
-مو انا اللي تركتها هي يلي تركت كل الدنيا وراحت لعند خالقها
-وتزوجتني لاني بذكرك فيها ؟ لاني بشبهها 😯
-لانه حسيت صورتها بوجهك .. حسيت انه ماتيلدا رح ترجعلي من اول وجديد
-ايه فهمت يعني انا كنت مجرد نسخة طبق الاصل من حبيبتك 😯😐
-ما بعرف ما بعرف انل مو سييء يا روعة مو سييء 😣
ما عرفت شو رد عليه .. شو المفروض هلء اعمل .. اترك بيتي وروح عند اهلي واندب حظي.. مفروض اتركه وعاقبه على كذبه .. ولا مفروض اتحمل الصدمة واجي على حالي 😯 شووو اعمل ؟ انا بحبه ..بحبه كتير .. قررت اني حكم عقلي وكون قوية ..
-طيب انا هلء غيرت شكلي وما عدت شبه ماتيلدا يلي بتحبها .. شو خلص ما بدك اياني ؟.
-لا بدي اياك بس انت رح تزيلي لون هالصبغة ورح تطولي شعرك صح ؟ رح تلبسي متلها وتضحكي متلها ؟ و .....
-هاد بعدك على فكرة .. انا روعة مو حدا تاني واذا بدك اياني هيك رح كمل معك واتحملك لحتى تتخلص من هالعقد يلي عندك ! واذا ما بدك بتطلقني وكل واحد بطريقه 😑
- مو على كيفك ابدا انت مرتي وحتعملي اللي بعجبني
-اها .. فجاة رجعت الشاب الشرقي المتخلف يلي بدو مرته تكون عبدة اله .. لسه قبل شوي كنت الماني وماتيلدا وابصر شو !!!
- روعة اخر كلام .. بدك تكوني متل ما بدي .. وانا ما رح طلقك ..
ما عرفت شو بدي احكي .. قررت كون قد حالي انا بفرجيك يا نادر ..ان ما خليتك تنسي انك زرت المانيا بيوم ..رح خليك تحب روعة بس روعة ..
طلع نادر من عندي .. رجعت ابكي على حظي الزفت ..كل جمالي ما شفعلي انه يكون حظي حلو ... يارب دخيلك 😢😢
تاني يوم رحت لعند طبيب نفسي وعرضت عليه حالة جوزي وانه في امل يتحسن او لا .. قلس طبعا فيه امل ..لانه متعلق بشي ميت يعني فعليا ما الي منافسه على ارض الواقع .. وهاي الشخصية وهمية بعقله و ممكن نساعده يتخلص منها .. قلي الدكتور انه لازم نستخدم اسلوب العلاج بالصدمة ... رح سايره بلاول وكون ماتيلدا يلي لازم يكرهها .. وكون وقت تاني روعة يلي لازم يحبها 😉
الجزء الخامس
قررت اني كون قوية وما خبر اهلي بشيء .. زوجي انسان طيب ومحتاج مساعدة ورح جرب ووقف جنبه .. خبرت نادر اني رح كمل معه متل ما بده بس بشرط.. انبسط كتير وقلي شرطك ملبى بس شو هو؟
-انا حابه نلعب سوا لعبه تغير حياتنا وانت اللي حتقرر الجائزة باخر المطاف ؟
-لعبة !!!!لعبة شو ؟
- رح كون يوم ماتيلدا ويوم روعة وانت بدك تتحملني يعني يوم الك ويوم الي وهاد هو العدل
-ما فهمت
قعدت مع نادر وخليته يحكيلي كل صفات ماتيلدا وعاداتها .. ما بتحب الاكل والطبخ .. بتحب الطلعات كتير .. بتلبس الالوان الغامقة والجينز .. بتلعب رياضة كتير كتيرر .. محتفظة بلون شعرها الطبيعي وما بتحب المكياج .. جدية شوي وما بتحب الضحك والمسخرة .. مطلعة ومثقفة وبتعتمد على حالها كتير .😢😯
يالله شو حلوة .. يالله شو كان مبسوط وهو عم يحكي عنها 😢 يالله شو بحسدها على حبه الها ..
بس انا قررت بلش المعركة واكيد رح اكسب ..وكنت كل خطواتي تابع مع الدكتور .. يوم رح ماتيلدا بكل صفاتها واليوم التاني روعة بصفات احلى ..سالته شو حابب كون اول يوم .. قال اكيد بدي تشبهيها .. فهمت عليه .. باول يوم حطيت باروكة بتشبه شعرها و ما في ولا نقطة مكياج على وجهها ولبست متلها تماما ... استقبلته بابتسامه .. كتيررر انبسط وقت شافني .. قعدناشوي وهو كتيى سعيد ..حملني وصار يلف فيني بالبيت وهو يضحك 😯 طلب ياكل قلتله حبيبي انا ما بطبخ وانت بتعرف خلينا نطلع ناكل برة .. حب الاقتراح و طلعنا اكلنا وانبسطنا .. ونحنا قاعدين بالمطعم ..كان في مجله عالطاوله .. انشغلت بقراءتها وكاني عم بتثقف .. بعد ما رجعنا عالبيت خبرته اني شاركت بنادي رياضة ولازم انزل بعد العصر .. سمحلي وهو مبسوط فيني وبالتغييرات😊☺
رجعت متاخر شوي حطيت راسي ونمت وكانه مو موجود .. تاني يوم الصبح اجا دور روعة شلت الباروكه وفردت شعري القصير وحطيت مكياج خفيف حلو .. نزلت عالجامعه اخدت محاضرتي ورجعت بسرعة عالبيت .قررت اطبخله من تحت ايدي وبما اني مو تبعت طبخ فتحت اليوتيوب وصرت امشي خطوة خطوة .. الحمد لله النتيجة كانت بتجنن ..وصل البيت .. كنت لابسه فستان احمر قصير وعامله شعري رولات .. كانت ريحة الاكل بتجنن .. شافني ابتسم بس ما اطلع بشكلي كتير وكانه مو عاجبه .. قعد عالسفرة وكان مبسوط بالاكل وقلي انه روعة .. بعدها غسل ايديه قعدت جنبه وكنت عم دلله وحسسه باهميته وانه احلى رجال بالكون .. حسيته تجاوب معي وحاب هالتغيير 😊☺
اليوم اللي بعده لبست ماتيلدا .. طول نهار كنت لابسه جينز .. رجع عالبيت ما لقا اكل .. سالني قلتله معلش انت بتعرفني ما بطبخ .. قال طيب مبارح طبختي 😯 قلتله : عفوا هديك روعة اللي بتطبخ مو انا 😉 كملت نهاري بقراية الكتب وما كنت خليه يقرب علي .. حتى كنت ما اهتم بجمالي ولا حتى بنضافتي لحتي يقرف يقرب مني ...
عالعكس تماما كنت بيوم روعة كون ملكة جمال و البس احلى شيء عندي واعمله اطيب الاكلات ودلله وخليه ياخد حقه مني وانا بقمة سعادتي واقعد واضحك معه ودلله وعامله متل صديقي وحبيبي وابني ..
بلش نادر يحس بالفرق ..كان يدايق كتير وقت يرجع ما يلاقي اهتمام ولا اكل ولا كلمة حلوة .. وحسيت انه حاببني طول الوقت ضل بشخصية روعة ..
-حبيبتي خليك بكرا بنفس هاد الستايل ..يعني نغير الاتفاق شوي ..يومين روعة ويوم ماتيلدا 😯
حسيت بمتعة النصر .. عم يطلب مني كون انا .. بلش يحب شخصيتي انا وشكلي انا وكلامي انا .. كملت معه بنفس الطريقة ... ما خليت هالشيء ياثر على دراستي وتخرجي .. والحمد لله تخرجت بمعدل منيح ونادر كان فخور فيني بالجامعة ..
وبيوم تخرجي عملي حفله كبيرة .. وحضني اخرتها وقلي ...
-روعة انا بحبك الك وما بدي غيرك ... وبدي تكوني كل يوم روعة .. مرتي وحبيبتي وصديقتي ..يلي عقلها بيركب على عقلي ويلي توبها من توبي ... انا بحبك 😍😍
-وانا بحبك و عندي الك مفاجاة على فكرة
-مفاجاة شو ..؟؟☺
- قبل كم يوم حللت وانا حامل .. 😁
-عنجد عم تحكي ؟؟؟؟😃😃
-ايه بس في مشكله
- خير يارب
- ما بعرف هالولد ابن ماتيلدا ولا روعة 😂😉
-لا اطمني ابن روعة .. لاني بحب روعة وبموت بروعة🙅😘😘😘
بالاخير انتصرت على ذاتي و حققت الشي يلي كان ممكن اي وحدة تعتبره مستحيل .. انا واجهت وكنت قد حالي لاني بعرف انه ارادة الانثى اقوى من كل الصعاب اللي بالدنيا 😊☺
انتهت

شاركه

عن غير معرف

هذا النص هو مثال لنص يمكن ان يستبدل في نفس المساحة ايضا يمكنك زيارة مدونة مدون محترف لمزيد من تحميل قوالب بلوجر.